స్థానిక సంస్థల ఎన్నికల్లో అక్రమ మద్యం అరికట్టాలి

ప్రొహిబిషన్ అండ్ ఎక్సైజ్ శాఖ కమిషనర్ చమకూరి శ్రీధర్

శ్రీకాకుళం,నవంబరు,13 మేజర్ న్యూస్: స్థానిక సంస్థల ఎన్నికల నేపథ్యంలో మీ మీ జిల్లాల్లో అక్రమ మద్యం, బెల్టు షాపులు, ఇతర ఎక్సైజ్ నేరాలను అరికట్టాలని ప్రొహిబిషన్ అండ్ ఎక్సైజ్ శాఖ చమకూరి శ్రీధర్ అధికారులను ఆదేశించారు. ఎక్సైజ్ డైరెక్టర్ ఆఫ్ ఎన్ ఫోర్స్ మెంట్ డైరెక్టర్ రాహుల్ దేవ్ శర్మ తో కలసి గురువారం శ్రీకాకుళం, విజయనగరం, పార్వతీపురం మన్యం జిల్లాల జిల్లా అధికారులతో శ్రీకాకుళంలో సమావేశం నిర్వహించారు. ఈ సందర్భంగా ఆయన మాట్లాడుతూ స్థానిక సంస్థల ఎన్నికల నేపథ్యంలో జిల్లాల్లో అక్రమ మద్యం, బెల్టు షాపులు, ఇతర ఎక్సైజ్ నేరాలను అరికట్టాలని ఆదేశించారు. సమావేశంలో చర్చించిన ప్రధాన అంశాలు:

రాబోయే స్థానిక సంస్థల ఎన్నికల దృష్ట్యా:

రాబోయే స్థానిక సంస్థల ఎన్నికల నేపథ్యంలో జిల్లాలో శాంతి భద్రతల పరిరక్షణకు, అక్రమ మద్యం, నాటు సారా, బెల్ట్ షాపులు, ఇతర ఎక్సైజ్ నేరాలను పూర్తిగా అరికట్టాలని అధికారులను ఆదేశించారు. ఎన్నికల సమయంలో ఎటువంటి అవాంఛనీయ సంఘటనలు జరగకుండా నిరంతర నిఘా, ఆకస్మిక తనిఖీలు మరియు దాడులు నిర్వహించాలన్నారు.

రెవెన్యూ వృద్ధి:

రాష్ట్ర ప్రభుత్వానికి రెవెన్యూ వృద్ధి కల్పించే దిశగా చర్యలు తీసుకోవాలని, లైసెన్సు నిబంధనలను కఠినంగా అమలు చేయాలని, అక్రమ మద్యం విక్రయాల వల్ల ప్రభుత్వ ఆదాయానికి నష్టం జరగకుండా చూడాలని ఆదేశించారు.

శ్రీకాకుళం IMFL డిపో తనిఖీ:

సమావేశానంతరం అధికారులు శ్రీకాకుళం ఐఎంఎఫ్ఎల్ డిపోను తనిఖీ చేశారు. డిపోలో స్టాక్ నిర్వహణ, రికార్డుల నిర్వహణను పరిశీలించారు. మద్యం దుకాణాలకు సకాలంలో, ఎటువంటి అంతరాయం లేకుండా సరఫరా జరిగేలా చూడాలని సంబంధిత అధికారులను ఆదేశించారు.

సాధారణ ఆదేశాలు:

అధికారులు, సిబ్బంది క్రమశిక్షణతో, నిబద్ధతతో విధులు నిర్వహించాలని, ప్రజా ఫిర్యాదులను సకాలంలో పరిష్కరించాలని, పారదర్శకత పాటించాలని సూచించారు. ఈ సమావేశంలో సమావేశంలో శ్రీకాకుళం, విజయనగరం, పార్వతీపురం మన్యం జిల్లా  ప్రొహిబిషన్ & ఎక్సైజ్ డిప్యూటీ కమిషనర్లు సుర్జీత్ సింగ్,  శ్రీనివాస చౌదరి, అసిస్టెంట్  కమిషనర్లు మనోహ, రామచంద్రరావు, ఎక్సయిజ్ సూపరింటెండెంట్లు  తిరుపతి నాయుడు, శ్రీనాధుడు, సహదేవుడు, అసిస్టెంట్ సూపరింటెండెంట్లు, ఎన్ఫోర్స్మెంట్ అధికారులు, ఐఎంఎఫ్ఎల్ డిపో మేనేజర్ జయసింహ చౌదరి, స్టేషన్ హౌస్ ఆఫీసర్లు, తదితరులు పాల్గొన్నారు.