స్థానిక ఎన్నికలు ప్రశాంతంగా జరిగేలా కట్టుదిట్టమైన చర్యలు శాంతిభద్రతలకు విఘాతం కలిగిస్తే కఠిన చర్యలు సమస్యాత్మక ప్రాంతాలపై ప్రత్యేక నిఘా.. చెన్నంపల్లి పోలింగ్‌ కేంద్రాలను పరిశీలించిన రూరల్‌ ఏఎస్పీ అశ్విన్‌ మణిదీప్‌
అనంతపురం బ్యూరో : రానున్న స్థానిక సంస్థల ఎన్నికలు ప్రశాంత వాతావరణంలో జరిగేలా పోలీసు శాఖ కట్టుదిట్టమైన చర్యలు చేపడుతోందని అనంతపురం రూరల్‌ సబ్‌ డివిజన్‌ ఏఎస్పీ అశ్విన్‌ మణిదీప్‌ ఐపీఎస్‌ తెలిపారు. ఎన్నికల సమయంలో గ్రామాల్లో శాంతిభద్రతలకు విఘాతం కలిగించే వారిపై చట్టప్రకారం కఠిన చర్యలు తీసుకుంటామని హెచ్చరించారు.
సోమవారం బుక్కరాయసముద్రం పోలీస్‌ స్టేషన్‌ను ఆకస్మికంగా సందర్శించిన ఏఎస్పీ.. మండల పరిధిలోని సమస్యాత్మక ప్రాంతాలకు చెందిన పలువురిని పోలీస్‌ స్టేషన్‌కు పిలిపించి సమావేశం నిర్వహించారు. ఈ సందర్భంగా ఎన్నికల సమయంలో అనుసరించాల్సిన నిబంధనలు, శాంతిభద్రతల పరిరక్షణకు తీసుకోవాల్సిన జాగ్రత్తలపై వారికి అవగాహన కల్పించారు.
ఎన్నికల ప్రక్రియ పారదర్శకంగా, ప్రశాంతంగా సాగేందుకు రాజకీయ పార్టీల నాయకులు, గ్రామస్తులు పోలీసు శాఖకు సహకరించాలని ఏఎస్పీ కోరారు. ఎన్నికల నియమావళిని ప్రతి ఒక్కరూ తప్పనిసరిగా పాటించాలని, ఎలాంటి అవాంఛనీయ సంఘటనలకు తావివ్వకుండా వ్యవహరించాలని సూచించారు. నిబంధనలను ఉల్లంఘించే వారిపై, వారు ఎంతటి వారైనా ఉపేక్షించకుండా చట్టపరమైన చర్యలు తీసుకుంటామని స్పష్టం చేశారు.
పోలింగ్‌ కేంద్రాల వద్ద భద్రతపై ఆరా
అనంతరం చెన్నంపల్లి గ్రామాన్ని సందర్శించిన ఏఎస్పీ అక్కడ ఏర్పాటు చేసిన పోలింగ్‌ కేంద్రాలను క్షేత్రస్థాయిలో పరిశీలించారు. పోలింగ్‌ కేంద్రాల వద్ద చేపట్టాల్సిన భద్రతా ఏర్పాట్లు, సమస్యాత్మక ప్రాంతాల్లో ముందస్తు చర్యలపై పోలీసు అధికారులకు పలు సూచనలు చేశారు. ఎన్నికల సమయంలో ఎలాంటి ఉద్రిక్త పరిస్థితులు తలెత్తకుండా అప్రమత్తంగా ఉండాలని, సమస్యాత్మక ప్రాంతాలపై ప్రత్యేక నిఘా ఏర్పాటు చేసి నిరంతరం పర్యవేక్షించాలని సిబ్బందిని ఆదేశించారు.
ఈ కార్యక్రమంలో బుక్కరాయసముద్రం సీఐ ఎం. సుబ్బరాయుడు, ఇతర పోలీసు సిబ్బంది పాల్గొన్నారు.
రిపోర్టర్ : మొయినుద్దీన్, అనంతపురం బ్యూరో, అనంతపురం.
