సోలార్‌ విద్యుత్‌ను సద్వినియోగం చేసుకోండి :ఎమ్మెల్యే బండారు
కొత్తపేట,మేజర్ న్యూస్:విద్యుత్‌ ఖర్చులను తగ్గించుకోవడంతో పాటు పర్యావరణ పరిరక్షణకు సోలార్‌ విద్యుత్‌ ఎంతో ఉపయోగకరమని కొత్తపేట ఎమ్మెల్యే బండారు సత్యానందరావు అన్నారు.కొత్తపేటలో పీఎం సూర్యఘర్‌ బిజిలీ యోజనపై నిర్వహించిన సేవా సేతు అభియాన్‌ కార్యక్రమంలో ఆయన పాల్గొని మాట్లాడారు.నియోజకవర్గానికి 3,365 సోలార్‌ యూనిట్లకు అవకాశం కల్పించగా ఇప్పటివరకు 679 మంది మాత్రమే వినియోగించుకున్నారని తెలిపారు.
అర్హులైన ప్రతి కుటుంబం ఈ పథకాన్ని సద్వినియోగం చేసుకోవాలని సూచించారు.మార్చి నెలాఖరు వరకు మాత్రమే సబ్సిడీ అందుబాటులో ఉంటుందని,అనంతరం సబ్సిడీ ఉండదని ఎమ్మెల్యే పేర్కొన్నారు.ఎస్సీ,ఎస్టీ లబ్ధిదారులకు 2 కిలోవాట్ల వరకు ప్రత్యేక ప్రయోజనాలు ఉన్నాయని వివరించారు.సోలార్‌ ప్యానల్స్‌ ఏర్పాటుతో విద్యుత్‌ బిల్లుల భారం తగ్గడంతో పాటు లో-వోల్టేజ్‌ సమస్యలు కూడా తగ్గుతాయని తెలిపారు.
సేవా సేతు శిబిరాల ద్వారా ప్రజలకు అవగాహన కల్పించడంతో పాటు ఆన్‌-ది-స్పాట్‌ నమోదు, విద్యుత్‌ సమస్యల పరిష్కారం చేపడుతున్నట్లు చెప్పారు.ఈ కార్యక్రమంలో కంఠంశెట్టి శ్రీనివాసరావు, గనిశెట్టి వీరేష్,కడలి భీమా,విద్యుత్‌ శాఖ ఈఈ కొత్తపల్లి రాంబాబు,డీఈఈ డి.చిట్టిరాజు,ఏఈలు ఎస్‌.శ్రీరామకృష్ణ,టి.అశోక్‌,పి.నరేష్‌ తదితరులు పాల్గొన్నారు.
