సంగం మసీదు సెంటర్‌లో పోలీసుల కార్డన్ సెర్చ్
సంగం, మేజర్ న్యూస్ : ప్రజల భద్రత, శాంతిభద్రతల పరిరక్షణే లక్ష్యంగా సంగం మసీదు సెంటర్‌లో పోలీసులు కార్డన్ సెర్చ్ నిర్వహించారు. సంగం సీఐ శ్రీనివాసరెడ్డి ఆధ్వర్యంలో చేపట్టిన ఈ తనిఖీల్లో పోలీసులు విస్తృతంగా తనిఖీలు చేపట్టారు. ఈ కార్డన్ సెర్చ్‌లో సంగం ఎస్సై భోజ్యా నాయక్, ఏఎస్‌పేట ఎస్సై జిలానీ, చేజర్ల ఎస్సై అయ్యప్పతో పాటు పోలీసు సిబ్బంది పాల్గొన్నారు. ఈ సందర్భంగా అనుమానాస్పద వ్యక్తులు, వాహనాలను క్షుణ్ణంగా పరిశీలించారు. వాహనాలకు సంబంధించిన రికార్డులు, ధ్రువపత్రాలను తనిఖీ చేసి, సరైన పత్రాలు లేని వాహనాల వివరాలను నమోదు చేశారు. ఈ సందర్భంగా పోలీసులు మాట్లాడుతూ.. గ్రామాలు, పట్టణాల్లో శాంతిభద్రతలకు విఘాతం కలిగించేలా ఎవరైనా వ్యవహరించినా, అసాంఘిక కార్యకలాపాలకు పాల్పడినా కఠిన చర్యలు తప్పవని హెచ్చరించారు. ప్రజలు చట్టాలను గౌరవిస్తూ పోలీసులకు సహకరించాలని సూచించారు. ప్రజలకు ఎలాంటి ఇబ్బందులు కలగకుండా భద్రత కల్పించడం, నేరాలను ముందుగానే అరికట్టడం, అసాంఘిక కార్యకలాపాలకు అడ్డుకట్ట వేయడమే ఈ తనిఖీల ప్రధాన ఉద్దేశమని పోలీసులు స్పష్టం చేశారు.
