శిథిలావస్థలో మద్ది బ్రిడ్జి..!

శిథిలావస్థలో మద్ది బ్రిడ్జి

ఏ క్షణంలోనైనా కుప్పకూలే ప్రమాదం

ఇనుప రాడ్లు బయటకు

పగుళ్లు పట్టిన స్లాబ్ లు

ప్రాణాలు అరచేతిలో పెట్టుకుని ప్రయాణం..

విజయనగరం,ఒడిస్సా, ఛత్తీస్ గఢ్, లకు వెళ్లే వందలాది భారీ వాహనాలతో వణికిపోతున్న వంతెన..

ఎమ్మెల్యే గంటా శ్రీనివాసరావు జోక్యం చేసుకోవాలని ప్రజల వేడుకోలు

పద్మనాభం, సెప్టెంబర్ 26,మేజర్ న్యూస్:

పద్మనాభం మండలం మద్ది గ్రామం వద్ద పూర్వం నుండి ఉన్న పురాతన బ్రిడ్జి ఇప్పుడు పూర్తిగా శిథిలావస్థకు చేరుకుని, ఎప్పుడు కూలిపోతుందో తెలియని దయనీయ స్థితిలో ఉంది. ఈ బ్రిడ్జిపై నుండి రోజూ వందలాది మంది ప్రజలు, విద్యార్థులు, రైతులు ప్రాణాలను పణంగా పెట్టి ప్రయాణం చేయాల్సిన దుస్థితి నెలకొంది. అధికారుల నిర్లక్ష్యం, ప్రజాప్రతినిధుల పట్టింపు లేకపోవడంతో ఈ బ్రిడ్జి నేడు మృత్యు వంతెనగా మారింది.

పూర్వం నుండి ఉన్న బ్రిడ్జి - దశాబ్దాలుగా మరమ్మతులు లేవు:

మద్ది గ్రామంలో గోస్థని నదిపై ఉన్న ఈ బ్రిడ్జి పూర్వం నుండి ఉంది. ఈ ప్రాంతంలో వ్యవసాయానికి, రాకపోకలకు ఈ బ్రిడ్జి ఎంతో కీలకం. చుట్టుపక్కల చాలా గ్రామాల ప్రజలు ఈ బ్రిడ్జి మీదుగానే పట్టణాలకు వెళ్లాల్సి ఉంటుంది. అయితే నిర్మించి చాలా సంవత్సరాలు గడవడం, ఏనాడూ శాశ్వత మరమ్మతులు, పటిష్టత పనులు చేపట్టకపోవడంతో బ్రిడ్జి పూర్తిగా పాడైపోయింది.బ్రిడ్జి పై కాంక్రీట్, స్లాబ్ లు పగుళ్లు వచ్చి పెద్ద పెద్ద గోతులు పడ్డాయి. స్టీల్ ఐరన్,  రాడ్లు బయటకు వచ్చి వాహనదారులకు, ముఖ్యంగా ద్విచక్ర వాహనదారులకు ప్రమాదకరంగా మారాయి. భారీ వాహనాలు వెళ్లేటప్పుడు బ్రిడ్జి కుంగిపోతున్నట్లు, కంపిస్తున్నట్లు స్థానికులు భయంతో చెబుతున్నారు. వర్షం వస్తే పరిస్థితి మరింత దారుణంగా తయారవుతోంది.

రాష్ట్రాలను కలిపే కీలక వంతెన - భారీ వాహనాల ఒత్తిడి:
ఈ బ్రిడ్జి ప్రాముఖ్యత సాధారణమైనది కాదు. నేలకొండ, కొండకరకం, పద్మనాభం మీదుగా విజయనగరం జిల్లాకు, అటు నుండి ఒడిస్సా, ఛత్తీస్ గఢ్ రాష్ట్రాలకు వెళ్లేందుకు ఇదే ప్రధాన మార్గం. క్వారీల నుండి వచ్చే వందలాది టిప్పర్లు, లారీలు, ఆర్టీసీ బస్సులు, కార్లు ఈ బ్రిడ్జి మీదుగానే వెళ్తున్నాయి.
రోజురోజుకూ భారీ వాహనాల సంఖ్య విపరీతంగా పెరగడంతో, పాత బ్రిడ్జి ఆ బరువును మోయలేక కుంగిపోతోంది. టన్నుల కొద్దీ బరువుతో వెళ్లే లారీల వల్ల బ్రిడ్జి పునాదులు కూడా బలహీనపడ్డాయని ఇంజనీరింగ్ నిపుణులు హెచ్చరిస్తున్నారు.

అధికారుల నిర్లక్ష్యంపై ప్రజల ఆగ్రహం:
ఈ బ్రిడ్జి శిథిలావస్థపై గ్రామస్తులు ఆర్ అండ్ బి డిపార్ట్ మెంట్ అధికారులకు, ఉన్నతాధికారులకు ఎన్నోసార్లు ఫిర్యాదు చేశారు. కానీ అధికారులు హడావుడిగా వచ్చి ఫోటోలు తీసుకుని వెళ్లిపోతున్నారు తప్ప, ఎలాంటి చర్యలు తీసుకోవడం లేదని స్థానికులు ఆగ్రహం వ్యక్తం చేస్తున్నారు. తాత్కాలికంగా కూడా రిపేర్లు చేయకపోవడంతో రాత్రి వేళల్లో ప్రమాదాలు జరుగుతున్నాయి.

ప్రభుత్వానికి తక్షణ విజ్ఞప్తి:
పెను ప్రమాదం జరిగి ప్రాణ నష్టం జరగక ముందే ప్రభుత్వం మేల్కోవాలని, నిపుణుల కమిటీతో బ్రిడ్జి పటిష్టతను పరీక్షించి, వెంటనే కొత్త బ్రిడ్జి నిర్మాణానికి శంకుస్థాపన చేయాలని ప్రజలు డిమాండ్ చేస్తున్నారు.

భీమిలి ఎమ్మెల్యే గంటా శ్రీనివాసరావు స్పందించాలి:
ఈ విషయంలో ఇప్పుడు స్థానిక ప్రజలందరి ఆశలు భీమిలి శాసనసభ్యులు గంటా శ్రీనివాసరావు గారిపైనే ఉన్నాయి. అభివృద్ధి ప్రదాతగా పేరున్న గంటా గారు ఈ సమస్యపై వెంటనే దృష్టి పెట్టాలని, ప్రభుత్వం నుండి ప్రత్యేక నిధులు మంజూరు చేయించి, యుద్ధ ప్రాతిపదికన కొత్త హైలెవల్ బ్రిడ్జి నిర్మాణం చేపట్టేలా చూడాలని మద్ది, పరిసర గ్రామాల ప్రజలు వేడుకుంటున్నారు."ఈ బ్రిడ్జి కూలితే చాలా గ్రామాలకు, జిల్లాలకు సంబంధాలు తెగిపోతాయి. పిల్లలు స్కూళ్లకు వెళ్లలేరు, రైతులు పంటలు తీసుకెళ్లలేరు. భీమిలి శాసనసభ్యులు గంటా శ్రీనివాసరావు వెంటనే జోక్యం చేసుకుని మమ్మల్ని కాపాడాలి" అని గ్రామస్తులు కన్నీటి పర్యంతమవుతున్నారు.