రాయదుర్గం రూరల్‌ను కరువు మండలంగా ప్రకటించాలి : ఎమ్మెల్యే కాలవ శ్రీనివాసులు
(మల్లికార్జున నేటి దినపత్రిక సూర్య స్టాఫ్ రిపోర్టర్)
రాయదుర్గం రూరల్ మండలంలో నెలకొన్న కరువు పరిస్థితులను పరిగణనలోకి తీసుకుని దాన్ని కరవు మండలంగా ప్రకటించేలా ప్రభుత్వానికి అవసరమైన ప్రతిపాదనలు పంపాలని వ్యవసాయ శాఖ జాయింట్ డైరెక్టర్ సాల్‌రెడ్డిని ఎమ్మెల్యే కాలవ శ్రీనివాసులు ఆదేశించారు.
అనంతపురంలోని తన క్యాంపు కార్యాలయంలో శనివారం వ్యవసాయ శాఖ అధికారులతో ఎమ్మెల్యే ప్రత్యేకంగా సమీక్ష నిర్వహించారు. రాయదుర్గం నియోజకవర్గంలోని పంటల పరిస్థితి, వర్షపాతం, కరువు స్థితిగతులపై అధికారులతో చర్చించారు. రాయదుర్గం రూరల్ మండలంలో జూన్ 1 నుంచి సెప్టెంబర్ చివరి వరకు సాధారణంగా 311.3 మిల్లీమీటర్ల వర్షపాతం నమోదు కావాల్సి ఉండగా, ఈ ఏడాది కేవలం 144.4 మిల్లీమీటర్ల వర్షం మాత్రమే కురిసిందన్నారు. సాధారణ వర్షపాతంతో పోలిస్తే సుమారు 53 శాతం లోటు నమోదైందన్నారు. ఆగస్టు 31 నుంచి సెప్టెంబర్ 20 వరకు వర్షపు చినుకు కూడా పడకపోవడంతో పంటలపై తీవ్ర ప్రభావం పడిందని పేర్కొన్నారు. రాయదుర్గం రూరల్ మండలంలో నెలకొన్న వాస్తవ పరిస్థితులు, వర్షపాతం లోటు, పంటల పరిస్థితిని సమగ్రంగా వివరిస్తూ ప్రభుత్వానికి తాజా ప్రతిపాదనలు పంపాలని కోరారు. అవసరమైతే ఈ అంశాన్ని ఉన్నతస్థాయిలో తాను పెద్దల దృష్టికి తీసుకెళ్లి పరిష్కారం కోసం కృషి చేస్తానన్నారు. ఎమ్మెల్యే సూచన మేరకు రాయదుర్గం రూరల్ మండలంలోని వర్షపాతం, పంటల పరిస్థితి తదితర వివరాలతో వ్యవసాయ శాఖ ఉన్నతాధికారులకు తాజా ప్రతిపాదనలు పంపుతామని జాయింట్ డైరెక్టర్ సాల్‌రెడ్డి తెలిపారు.
