చికెన్‌ వ్యర్థాల తరలింపుపై చర్యలు తీసుకోవాలి
వెంకటాచలం మేజర్ న్యూస్ : మండల పరిధిలో చికెన్‌ వ్యర్థాలను తరలిస్తున్న వాహనాలపై చర్యలు తీసుకోవాలని స్థానికులు కోరుతున్నారు. నిత్యం నాలుగైదు బొలెరో పికప్‌ వాహనాల్లో చికెన్‌ వ్యర్థాలను తరలిస్తున్నారని వారు ఆరోపిస్తున్నారు. టోల్‌ప్లాజా వద్ద ఏపీ 39 టీ జెడ్ 5550 నంబర్‌ గల బొలెరో పికప్‌ వాన్‌ నిలిచి ఉండగా, సుమారు 2500 కేజీ ల వ్యర్థాల తరలింపుపై ప్రశ్నించిన ఓ జర్నలిస్టుకు, వాహన నిర్వాహకులకు మధ్య వాగ్వాదం జరిగినట్లు సమాచారం. ఈ సందర్భంగా జర్నలిస్టును ఉద్దేశించి బెదిరింపు వ్యాఖ్యలు చేసినట్లు ఆరోపణలు వ్యక్తమయ్యాయి.
చికెన్‌ వ్యర్థాలను తరలించి చేపల మేతగా వినియోగిస్తున్నారనే అంశంపై ప్రజలు ఆందోళన వ్యక్తం చేస్తున్నారు. ఈ విషయంపై గతంలో పలుమార్లు అధికారులకు సమాచారం అందించినప్పటికీ చర్యలు తీసుకోలేదని స్థానికులు పేర్కొంటున్నారు. సంబంధిత అధికారులు స్పందించి వ్యర్థాల తరలింపుపై విచారణ జరిపి, నిబంధనలు ఉల్లంఘించినట్లు తేలితే బాధ్యులపై చర్యలు తీసుకోవాలని ప్రజలు కోరుతున్నారు.
