పుట్టినరోజున హీరోయిన్‌కు ఊహించని షాక్.. అభిమాని అతి ప్రవర్తనపై నెటిజన్ల ఫైర్
సూర్య ఎంటర్‌టైన్‌మెంట్ డెస్క్: శాండల్‌వుడ్‌లో స్టార్ హీరోయిన్‌గా ప్రత్యేక గుర్తింపు తెచ్చుకున్న కన్నడ భామ రచితా రామ్ ప్రస్తుతం సోషల్ మీడియాలో హాట్ టాపిక్‌గా నిలిచారు. సుమారు పన్నెండు సంవత్సరాలుగా చిత్ర పరిశ్రమలో రాణిస్తున్న ఈ అందాల తార తెలుగులోనూ సూపర్ మచ్చి చిత్రంతో ప్రేక్షకులను పలకరించారు. ప్రతి ఏడాది తన పుట్టినరోజు సందర్భంగా అభిమానులను కలవడం ఆమెకు ఆనవాయితీ. ఈ క్రమంలోనే తాజాగా అక్టోబర్ 3న తన పుట్టినరోజును పురస్కరించుకుని ఏర్పాటు చేసిన వేడుకలో ఆమెను చూసేందుకు భారీగా ఫ్యాన్స్ తరలివచ్చారు. వారితో ఉత్సాహంగా సెల్ఫీలు దిగుతూ ఆమె సందడి చేస్తుండగా ఒక ఊహించని పరిణామం చోటుచేసుకుంది.
వేడుకలో భాగంగా రచితా రామ్ దగ్గరకు వచ్చిన ఒక యువ అభిమాని ముందుగా ఆమెతో కలిసి సెల్ఫీ తీసుకున్నాడు. ఆ తర్వాత ఆమెకు షేక్‌హ్యాండ్ ఇచ్చి అక్కడితో ఆగకుండా ఒక్కసారిగా ఆమె రెండు బుగ్గలను పట్టుకుని గిల్లాడు. ఈ అనూహ్య పరిణామానికి హీరోయిన్ ఒక్కసారిగా షాక్‌కు గురయ్యారు. అయినప్పటికీ తేరుకుని క్యూట్‌గా నవ్వుతూ అక్కడి నుంచి సర్దుబాటు చేసుకున్నారు. ఇందుకు సంబంధించిన పూర్తి వీడియో కెమెరాలో రికార్డు కావడంతో ప్రస్తుతం నెట్టింట విపరీతంగా వైరల్ అవుతోంది.
ఈ ఘటనపై సోషల్ మీడియాలో నెటిజన్లు తీవ్రంగా స్పందిస్తున్నారు. సెలబ్రిటీల వ్యక్తిగత స్పేస్‌ను గౌరవించకుండా అభిమానులు ఇలా ప్రవర్తించడం సరికాదని కొందరు మండిపడుతుంటే, మరికొందరు మాత్రం దీన్ని కేవలం ఒక సరదా ఫ్యాన్ మూమెంట్‌గా అభివర్ణిస్తూ కామెంట్లు పెడుతున్నారు. ఏది ఏమైనప్పటికీ బర్త్ డే రోజున అభిమాని చేసిన ఈ అతి ప్రవర్తన ప్రస్తుతం సినీ వర్గాల్లో తీవ్ర చర్చనీయాంశంగా మారింది.
