రాజకీయ అనుభవమే బలం

భోగాపురం, అక్టోబర్ 21, (మేజర్ న్యూస్) : రాజకీయ అనుభవం, కుటుంబ నేపథ్యం, ప్రజాప్రతినిధిగా గతంలో పనిచేసిన అనుభవంతో నీలాపు సూర్యలక్ష్మి మరోసారి ఎంపీటీసీ ఎన్నికల బరిలోకి దిగారు. చేపలకంచేరు ఎంపీటీసీ అభ్యర్థిగా నామినేషన్ దాఖలు చేసి, ఎన్నికల రిటర్నింగ్ అధికారి ఎం. రామారావుకు పత్రాలు సమర్పించారు. ఎంబీఏ విద్యార్హత కలిగిన సూర్యలక్ష్మి 2014–2019 మధ్య ఎంపీటీసీగా పనిచేసి తన రాజకీయ అనుభవాన్ని చాటుకున్నారు. ఈమె భర్త నీలాపు అప్పలరామిరెడ్డి(ఎస్పిఎల్) తెదేపా విజయనగరం పార్లమెంట్ అధికార ప్రతినిధిగా వ్యవహరిస్తున్నారు.  సూర్యలక్ష్మి తల్లి శీరపు సూరమ్మ సైతం 2009–2014 మధ్య రెడ్డికంచేరు సెగ్మెంట్ నుంచి ఎంపీటీసీగా గెలుపొందారు. ఇలా కుటుంబంలోనే ప్రజాప్రతినిధులుగా పనిచేసిన అనుభవం ఉండటంతో నీలాపు కుటుంబానికి స్థానిక రాజకీయాల్లో ప్రత్యేక గుర్తింపు ఉంది. గతంలో ఎంపీటీసీగా పనిచేసిన అనుభవాన్ని, కుటుంబ రాజకీయ నేపథ్యాన్ని బలంగా మలుచుకుంటూ ఈసారి చేపలకంచేరు నుంచి మరోసారి విజయం సాధించాలని సూర్యలక్ష్మి ప్రణాళికలు సిద్ధం చేసుకుంటున్నారు. అత్యధిక మెజారిటీతో గెలుపొందడమే లక్ష్యంగా ఎన్నికల బరిలోకి దిగిన ఆమెకు కుటుంబ రాజకీయ అనుభవం ఎంతవరకు కలిసివస్తుందన్నది ఆసక్తికరంగా మారింది.

రిపోర్టర్ : వై శ్రీనివాస రావు, భోగాపురం, విజయనగరం జిల్లా.