పుస్తక పఠనంతోనే విజ్ఞాన వికాసం గ్రంథాలయ వారోత్సవాల్లో భాగంగా పుస్తక ప్రదర్శనలో ఉత్సాహంగా పాల్గొన్న విద్యార్థులు

సూళ్లూరుపేట మేజర్ న్యూస్

59వ జాతీయ గ్రంథాలయ వారోత్సవాలను పురస్కరించుకుని సూళ్లూరుపేట శాఖ గ్రంథాలయం ఆధ్వర్యంలో ఆదివారం పుస్తక ప్రదర్శన నిర్వహించారు.గ్రంథాలయ అధికారి ఎన్ శ్రీనివాసులు పర్యవేక్షణలో జరిగిన ఈ కార్యక్రమానికి మన్నారుపోలు గ్రామంలోని ఆర్ఎంకె ఇంగ్లీష్ మీడియం పాఠశాల విద్యార్థులు పెద్ద సంఖ్యలో హాజరై ఉత్సాహంగా పాల్గొన్నారు.ఈ సందర్భంగా ఏర్పాటు చేసిన వివిధ రకాల పుస్తకాల ప్రదర్శన విద్యార్థులను విశేషంగా ఆకట్టుకుంది. విజ్ఞాన, సాహిత్య,చారిత్రక అంశాలకు సంబంధించిన పుస్తకాలను విద్యార్థులు ఆసక్తిగా పరిశీలించారు.అనంతరం పాఠశాల కరస్పాండెంట్ ఆర్ లీలాకుమార్ మాట్లాడుతూ విద్యార్థులు పాఠ్యపుస్తకాలకే పరిమితం కాకుండా గ్రంథాలయాల్లో లభించే వివిధ విజ్ఞానదాయక పుస్తకాలను చదివే అలవాటు పెంపొందించుకోవాలన్నారు. పుస్తక పఠనం ద్వారా జ్ఞానాన్ని పెంపొందించుకుని భవిష్యత్తులో ఉన్నత శిఖరాలను అధిరోహించాలని ఆకాంక్షించారు.గ్రంథాలయ అధికారి ఎన్ శ్రీనివాసులు మాట్లాడుతూ పుస్తక పఠనం వల్ల మేధో వికాసంతో పాటు సృజనాత్మకత,ఆలోచనా శక్తి పెరుగుతాయన్నారు. విద్యార్థుల్లో పఠనాసక్తిని పెంపొందించడమే ఇలాంటి కార్యక్రమాల ముఖ్య ఉద్దేశమన్నారు.ఈ కార్యక్రమంలో పాఠశాల ఉపాధ్యాయులు,విద్యార్థులు, స్థానిక పాఠకులు పాల్గొని పుస్తక ప్రదర్శనను విజయవంతం చేశారు.