పురోహితుడి నుంచి వెండితెరకు రవికిరణ్ శర్మ

పామూరు, మేజర్ న్యూస్ : మంత్రోచ్ఛారణలతో శుభకార్యాలు నిర్వహించే పురోహితుడు నటనపై ఉన్న మక్కువతో వెండితెరపై తన ప్రతిభను చాటేందుకు అడుగులు వేశారు. పామూరు మండలంలోని బొట్లగూడూరుకు చెందిన పురోహితుడు కొల్లూరి రవికిరణ్ శర్మ తనలోని నటనా అభిరుచికి పదునుపెట్టి చలనచిత్ర రంగంలోకి ప్రవేశించారు. ఆయన ప్రధాన పాత్రలో నటించిన ‘ప్రేమ డైరీలో చివరి పేజీలు’ చిత్రాన్ని రేపు  ఉదయం 8:30 గంటలకు పామూరు పట్టణంలోని కేబీ థియేటర్‌లో ప్రదర్శించనున్నారు. మూడు రోజుల పాటు ప్రేక్షకులకు ఉచితంగా చిత్రాన్ని ప్రదర్శించనున్నట్లు రవికిరణ్ శర్మ తెలిపారు.

పురోహిత వృత్తిలో కొనసాగుతూనే నటనపై ఉన్న ఆసక్తితో చలనచిత్ర రంగం వైపు అడుగులు వేసినట్లు రవికిరణ్ శర్మ తెలిపారు. తనకు లభించిన అవకాశాన్ని సద్వినియోగం చేసుకుంటూ ‘ప్రేమ డైరీలో చివరి పేజీలు’ చిత్రంలో ప్రధాన పాత్ర పోషించినట్లు పేర్కొన్నారు. ప్రేక్షకుల ఆదరణతో రాబోయే రోజుల్లో మరిన్ని చిత్రాల్లో నటిస్తూ సినీ రంగంలో ప్రత్యేక గుర్తింపు సాధించాలన్నదే తన లక్ష్యమన్నారు.

ఈ చిత్రానికి హరికృష్ణ పమంజి దర్శకత్వం వహించగా, హీరోగా పీవీ అర్జున్, హీరోయిన్‌గా అతిథి నటించారు. పలాని స్వామి, ప్రశాంత్ రెడ్డి తదితరులు ముఖ్య పాత్రల్లో నటించారు. ఇప్పటికే ‘లైఫ్’, ‘పలాని వాళ్ల అబ్బాయి’, ‘ఫలి’ చిత్రాలు నిర్మాణ దశలో ఉన్నాయని రవికిరణ్ శర్మ తెలిపారు. తన బాధ్యతలను నిర్వర్తిస్తూనే కళారంగంలోనూ తన ప్రయాణాన్ని కొనసాగిస్తానని ఆయన పేర్కొన్నారు.