ప్రజాస్వామ్య పరిరక్షణకు ప్రతి ఒక్కరూ ఓటు హక్కును వినియోగించుకోవాలి : ఎంపీ చిన్ని

విజయవాడ, మేజర్ న్యూస్: ప్రజాస్వామ్యంలో ఓటు హక్కు అత్యంత విలువైనదని, ప్రతి ఒక్కరూ తమ ఓటు హక్కును బాధ్యతగా వినియోగించుకోవాలని విజయవాడ ఎంపీ కేశినేని శివనాథ్ (చిన్ని) పిలుపునిచ్చారు. ఆదివారం విజయవాడలోని లయోలా కళాశాల ఆవరణలో ఏర్పాటు చేసిన పోలింగ్ కేంద్రంలో ఎంపీ తన సతీమణి జానకీ లక్ష్మితో కలిసి ఓటు హక్కును వినియోగించుకున్నారు. ఈ సందర్భంగా తన తల్లిని వీల్‌చైర్‌పై పోలింగ్ కేంద్రానికి తీసుకువచ్చి ఆమెతో కూడా ఓటు వేయించారు. అనంతరం ఎంపీ మాట్లాడుతూ నగరంలో ఉదయం 7 గంటల నుంచే పోలింగ్ ప్రశాంతంగా కొనసాగుతోందని, అధికారులు ఓటర్లకు ఎలాంటి ఇబ్బందులు కలగకుండా అన్ని ఏర్పాట్లు చేశారని తెలిపారు. ముఖ్యంగా వృద్ధుల కోసం పోలింగ్ కేంద్రాల వద్ద వీల్‌చైర్లను ఏర్పాటు చేయడం అభినందనీయమన్నారు. వయోభారంతో ఇబ్బందులు ఉన్నప్పటికీ పెద్దలు పోలింగ్ కేంద్రాలకు వచ్చి ఓటు వేయడం సంతోషకరమని పేర్కొన్నారు. గత అసెంబ్లీ, పార్లమెంట్ ఎన్నికల్లో నమోదైన ఓటింగ్ శాతానికి సమానంగా ప్రస్తుత ఎన్నికల్లో కూడా పోలింగ్ నమోదవుతుందని ఆశాభావం వ్యక్తం చేశారు. నగర అభివృద్ధికి, ప్రజా సమస్యల పరిష్కారానికి కృషి చేసే అభ్యర్థులను ఎన్నుకోవాలని సూచించారు. యువత సైతం ఓటు హక్కును నిర్లక్ష్యం చేయకుండా ప్రజాస్వామ్య ప్రక్రియలో చురుగ్గా పాల్గొనాలని, సాయంత్రం 5 గంటలలోపు ప్రతి ఒక్కరూ తమ ఓటు హక్కును వినియోగించుకోవాలని ఎంపీ కేశినేని శివనాథ్ విజ్ఞప్తి చేశారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.