ప్రైవేట్ ఆసుపత్రుల్లో టీబీ నియంత్రణ కార్యక్రమంపై పర్యవేక్షణ
నెల్లూరు, మేజర్ న్యూస్ : జాతీయ క్షయ నియంత్రణ కార్యక్రమంలో భాగంగా నెల్లూరు నగరంలోని విజయ హాస్పిటల్, జయభారతి హాస్పిటల్లలోని ల్యాబ్లు, ఎక్స్రే కేంద్రాలను జిల్లా లెప్రసీ, ఎయిడ్స్ మరియు టీబీ అధికారి డాక్టర్ ఎస్.కే. ఖాదర్ వల్లి నవంబర్ 14వ తేదీన పర్యవేక్షించారు. ఈ సందర్భంగా ఆయన మాట్లాడుతూ రెండు వారాలకు మించి దగ్గు, జ్వరం, ఆకలి మందగించడం, బరువు తగ్గడం, పిల్లల్లో బరువు పెరగకపోవడం, దగ్గినప్పుడు కఫం రావడం వంటి లక్షణాలు ఉన్నవారిని టీబీ అనుమానితులుగా గుర్తించి వెంటనే టీబీ ఆసుపత్రులకు రెఫర్ చేయాలని ప్రైవేట్ ఆసుపత్రుల సిబ్బందికి సూచించారు. రెఫర్ చేసిన వారికి కఫం పరీక్షలు, ఛాతీ ఎక్స్రే పరీక్షలు నిర్వహిస్తారని, టీబీ వ్యాధి నిర్ధారణ అయితే ఆరు నెలల పాటు ఉచితంగా చికిత్స మందులు అందజేస్తారని తెలిపారు. బాధితుల వ్యక్తిగత వివరాలను పూర్తిగా గోప్యంగా ఉంచుతామని స్పష్టం చేశారు. అలాగే టీబీ లక్షణాలతో ఆసుపత్రులకు వచ్చే వారి వివరాలను ప్రైవేట్ ఆసుపత్రులు సేకరించాలని, ఆ సమాచారాన్ని క్షయ నివారణ సిబ్బంది నిక్షయ్ వెబ్ పోర్టల్లో నమోదు చేస్తారని వివరించారు. అనంతరం ఆసుపత్రుల్లోని ల్యాబ్ల పనితీరును పరిశీలించారు. జిల్లాలో ప్రస్తుతం నిర్వహిస్తున్న టీబీ ముక్త్ అభియాన్ కార్యక్రమం లక్ష్యాలు, అమలు విధానంపై కూడా వైద్య సిబ్బందికి అవగాహన కల్పించారు. ఈ కార్యక్రమంలో నెల్లూరు జిల్లా టీబీ నివారణ కార్యక్రమం పీపీఎం కోఆర్డినేటర్ పి. హరీష్ తదితరులు పాల్గొన్నారు.