పొదలకూరులో ఎన్నికల భద్రతపై పోలీసుల ప్రత్యేక నిఘా

పొదలకూరు,  మేజర్ న్యూస్ :    పరిషత్ ఎన్నికల నేపథ్యంలో నామినేషన్ల ప్రక్రియ ప్రశాంతంగా, పారదర్శకంగా జరిగేలా పోలీసులు ప్రత్యేక భద్రతా చర్యలు చేపట్టారు. ఇందులో భాగంగా పొదలకూరు మండల పరిషత్ కార్యాలయంలో కొనసాగుతున్న నామినేషన్ల ప్రక్రియను నెల్లూరు రూరల్ డీఎస్పీ ఘట్టమనేని శ్రీనివాసరావు గురువారం పరిశీలించారు. నామినేషన్ల దాఖలు సమయంలో ఎలాంటి అవాంఛనీయ ఘటనలకు తావులేకుండా అప్రమత్తంగా వ్యవహరించాలని పోలీసు అధికారులకు సూచించారు. నామినేషన్ల స్వీకరణతో పాటు పరిశీలన సమయంలోనూ భద్రతా ఏర్పాట్లపై ప్రత్యేక దృష్టి సారించాలని, అభ్యర్థులు, వారి అనుచరుల రాకపోకలను పర్యవేక్షిస్తూ శాంతిభద్రతలకు విఘాతం కలగకుండా చర్యలు తీసుకోవాలని ఆదేశించారు. ఈ సందర్భంగా పొదలకూరు సీఐ గుత్తి వెంకట్రావు, ఎస్సై శివ రాకేష్‌లకు భద్రతా నిర్వహణపై పలు సూచనలు చేశారు. ఎన్నికల ప్రక్రియలో ఎలాంటి ఉద్రిక్త పరిస్థితులు తలెత్తకుండా ముందస్తు జాగ్రత్తలు తీసుకోవాలని, ప్రజలకు ఎలాంటి ఇబ్బందులు కలగకుండా విధులు నిర్వహించాలని స్పష్టం చేశారు. పరిషత్ ఎన్నికల నేపథ్యంలో శాంతిభద్రతల పరిరక్షణకు పోలీసు శాఖ అప్రమత్తంగా వ్యవహరిస్తూ, నామినేషన్ల ప్రక్రియ సజావుగా సాగేందుకు అవసరమైన చర్యలపై దృష్టి సారించిందని ఈ సందర్భంగా డిఎస్పి శ్రీనివాసరావు తెలిపారు.