పెండింగ్‌ కేసుల పరిష్కారంలో వేగం పెంచాలి - మంచిర్యాల డీసీపీ

సూర్య నస్పూర్‌ : పెండింగ్‌ కేసుల పరిష్కారంలో జాప్యం లేకుండా చర్యలు తీసుకోవాలని మంచిర్యాల డీసీపీ ఎ భాస్కర్‌ పోలీస్‌ అధికారులను ఆదేశించారు. శుక్రవారం సాయంత్రం శ్రీరాంపూర్‌ పోలీస్‌ స్టేషన్‌ను ఆయన ఆకస్మికంగా తనిఖీ చేశారు. పోలీస్‌ స్టేషన్‌ పనితీరు, కేసుల దర్యాప్తు పురోగతి, ప్రజలకు అందుతున్న పోలీస్‌ సేవలను సమీక్షించారు. ఈ సందర్భంగా స్టేషన్‌ పరిసరాలను పరిశీలించి పరిశుభ్రత పాటించాలని సిబ్బందికి సూచించారు. రిసెప్షన్‌ కేంద్రాన్ని సందర్శించి ఫిర్యాదుల స్వీకరణ, రికార్డుల నిర్వహణ తీరును పరిశీలించారు. పోలీస్‌ స్టేషన్‌కు వచ్చే ప్రతి ఫిర్యాదుదారుడితో మర్యాదపూర్వకంగా వ్యవహరించాలని, వారి సమస్యలను శ్రద్ధగా విని చట్టప్రకారం పరిష్కరించేందుకు చర్యలు తీసుకోవాలని సూచించారు. ప్రజలకు పోలీస్‌ సేవలు మరింత మెరుగ్గా అందేలా సిబ్బంది బాధ్యతాయుతంగా విధులు నిర్వర్తించాలని స్పష్టం చేశారు. స్టేషన్‌లో నమోదైన కేసులు, వాటి దర్యాప్తు పురోగతి, పెండింగ్‌ కేసుల వివరాలను పరిశీలించిన డీసీపీ.. కేసుల పరిష్కారంలో వేగం పెంచాలని అధికారులకు సూచించారు. వివిధ రికార్డులు, రిజిస్టర్లను తనిఖీ చేశారు. స్టేషన్‌ రైటర్‌, సీసీటీఎన్‌ఎస్‌ రైటర్లతో మాట్లాడి కేసుల వివరాలను ఆన్‌లైన్‌లో నమోదు చేయడం, రికార్డులను సక్రమంగా అప్‌లోడ్‌ చేయడం వంటి అంశాలపై ఆరా తీశారు. పోలీస్‌ స్టేషన్‌ నిర్వహణలో నిబంధనలు పాటిస్తూ విధులను సమర్థవంతంగా నిర్వహించాలని సూచించారు.ఈ కార్యక్రమంలో శ్రీరాంపూర్‌ సీఐ  ఆకుల అశోక్‌, ఎస్‌ఐ సంతోష్‌, పోలీస్‌ సిబ్బంది, తదితరులు పాల్గొన్నారు.