ఒక్కరోజే 20 నామినేషన్లు దాఖలు

పొదలకూరు, మేజర్ న్యూస్ :    పొదలకూరు మండలంలో స్థానిక సంస్థల ఎన్నికల నామినేషన్ల ప్రక్రియ జోరుగా సాగుతోంది. మండలంలోని 19 ఎంపీటీసీ స్థానాలకు ఇప్పటివరకు మొత్తం 95 నామినేషన్లు దాఖలైనట్లు ఎన్నికల అధికారులు వెల్లడించారు. గురువారం వరకు నమోదైన నామినేషన్లతో కలిపి శుక్రవారం ఒక్కరోజే 20 నామినేషన్లు దాఖలయ్యాయి. పార్టీలు వారీగా పరిశీలిస్తే వైఎస్సార్ కాంగ్రెస్ పార్టీ అభ్యర్థుల నుంచి అత్యధికంగా 48 నామినేషన్లు దాఖలు కాగా, తెలుగుదేశం పార్టీ అభ్యర్థుల నుంచి 44 నామినేషన్లు నమోదయ్యాయి. బీజేపీ, సీపీఐ, జనసేన పార్టీల నుంచి ఒక్కొక్క నామినేషన్ చొప్పున దాఖలయ్యాయి. దీంతో మొత్తం నామినేషన్ల సంఖ్య 95కు చేరింది. ప్రధాన రాజకీయ పార్టీలైన వైసీపీ, టీడీపీ మధ్య నామినేషన్ల సంఖ్యలో స్వల్ప వ్యత్యాసం ఉండటంతో మండలంలో ఎన్నికల పోరు ఆసక్తికరంగా మారింది. నామినేషన్ల ప్రక్రియకు సంబంధించిన వివరాలను పొదలకూరు ఎన్నికల రిటర్నింగ్ అధికారి అధికారిక నివేదిక ద్వారా వెల్లడించారు.