పొదలకూరు నామినేషన్ కేంద్రం వద్ద పోలీసుల ఓవర్ యాక్షన్

పొదలకూరు,  మేజర్ న్యూస్ :  పొదలకూరు నామినేషన్ కేంద్రం వద్ద పోలీసుల వ్యవహారశైలి చర్చనీయాంశంగా మారింది.స్థానిక సంస్థల ఎన్నికల నామినేషన్ల ప్రక్రియ నేపథ్యంలో వార్తా సేకరణకు వెళ్లిన మీడియా ప్రతినిధులను కేంద్రం వద్దకు అనుమతించకపోవడంపై అభ్యంతరాలు వ్యక్తం అవుతున్నాయి.జిల్లాలో పలుచోట్ల మీడియాకు పాయింట్ ఏర్పాటు చేసి, అక్కడ నుండి కవరేజ్ చేసుకునే విధంగా  వెసులుబాటు కల్పించారు. కానీ పొదలకూరులో ఆ పరిస్ధితి లేదు.ఫలితంగా మీడియా ప్రతినిధులు రోడ్ల మీద ఉండాల్సిన పరిస్థితి నెలకొంది.నామినేషన్ ప్రక్రియకు సంబంధించిన సమాచారాన్ని సేకరించేందుకు వెళ్లిన మీడియా ప్రతినిధుల పట్ల పోలీసులు ఆంక్షలు విధించడంతో పాటు, ఏదైనా సమస్య ఉంటే రిటర్నింగ్ అధికారితో మాట్లాడుకోవాలంటూ దురుసుగా సమాధానమిచ్చినట్లు ఆరోపణలు వినిపిస్తున్నాయి.ఎన్నికల ప్రక్రియను ప్రశాంతంగా, పారదర్శకంగా నిర్వహించాల్సిన బాధ్యత అధికారులపై ఉంది.అదే సమయంలో ప్రజలకు సమాచారాన్ని చేరవేసే మీడియా విధులకు ఆటంకాలు కలగకుండా చూడాల్సిన అవసరం కూడా ఉంది.భద్రతా కారణాలతో ఆంక్షలు విధించినప్పటికీ,వాటి పరిధి ఏమిటి? మీడియా ప్రతినిధులను ఎందుకు అనుమతించడం లేదు? అనే ప్రశ్నలు తలెత్తుతున్నాయి.మీడియా విధులకు ఆటంకాలు కలగకుండా,ఎన్నికల నిబంధనలకు అనుగుణంగా స్పష్టమైన మార్గదర్శకాలు అమలు చేయాలని పాత్రికేయులు కోరుతున్నారు.పొదలకూరు నామినేషన్ కేంద్రం వద్ద చోటుచేసుకున్న ఈ పరిణామాలపై ఉన్నతాధికారులు స్పందిస్తారా? మీడియా ప్రతినిధులకు స్పష్టత ఇస్తారా? అనేది వేచి చూడాల్సిన దుస్థితి ఏర్పడింది.