వెల్లటూరు ఎంపీటీసీ సభ్యులుగా ఇరువురు నామినేషన్

భట్టిప్రోలు, మేజర్ న్యూస్: భట్టిప్రోలు మండలం వెల్లటూరు గ్రామ రెండు ఎంపీటీసీ సెగ్మెంట్లకు తెలుగుదేశం పార్టీ తరఫున గురువారం ఇరువురు నామినేషన్లు దాఖలు చేశారు. రాష్ట్ర కమ్మ కార్పొరేషన్ డైరెక్టర్ మోటూరు పుణ్య శ్రీనివాస కుమార్ ఆధ్వర్యంలో ఒకటవ సెగ్మెంట్ కు జంపని వర్ధని, రెండవ సెగ్మెంట్ కు డొక్కా రామస్వామి లు నామినేషన్ పత్రాలను రిటర్నింగ్ అధికారికి డాక్టర్ ఎన్ దేవలక్ష్మి కి అందించారు. వెల్లటూరు నుండి తెలుగుదేశం పార్టీ శ్రేణులు భారీ ర్యాలీగా భట్టిప్రోలు ఎండిఓ కార్యాలయానికి విచ్చేసి నామినేషన్ పత్రాలను దాఖలు చేశారు. ఈ కార్యక్రమంలో టౌన్ అధ్యక్షులు కాట్రగడ్డ నాగమల్లేశ్వరరావు, నాయకులు గొట్టిపాటి కృష్ణారావు, పమిడిముక్కల సాంబశివరావు పలువురు తెలుగుదేశం పార్టీ, కూటమి నాయకులు అధిక సంఖ్యలో పాల్గొన్నారు.