పత్తి పంటలో అంతర పంటగా గంజాయి సాగు

 సూర్య బోథ్:బోథ్ మండలం నిగిని గ్రామ శివారులోని వ్యవసాయ భూమిలో తక్కువ సమయంలో ఎక్కువ డబ్బులు సంపాదించాలని దురుద్దేశంతో అక్రమంగా గంజాయి సాగు చేస్తున్న వ్యక్తిని పోలీసులు గుర్తించారు. అతని వ్యవసాయ భూమిలో పత్తి పంట మధ్యలో పెంచుతున్న 40 గంజాయి మొక్కలను గుర్తించారు. వీటి విలువ సుమారు రూ.4 లక్షలు ఉంటుందని అంచనా వేశారు.నిగిని గ్రామానికి చెందిన లక్ష్మన్ మదావి (51) తనకు గంజాయి తాగే అలవాటు ఉండటంతో  గంజాయి కొనుగోలు చేసి వినియోగించిన అనంతరం మిగిలిన గంజాయి నుంచి విత్తనాలను సేకరించినట్లు విచారణలో వెల్లడించారు. తక్కువ సమయంలో ఎక్కువ డబ్బులు సంపాదించాలనే ఉద్దేశంతో తన వ్యవసాయ భూమిలో పత్తి పంట మధ్యలో ఎవరికీ తెలియకుండా గంజాయి మొక్కలను పెంచుతున్నట్లు తెలిపారు. మొత్తం 40 గంజాయి మొక్కలు గుర్తించారు. ఒక్కో మొక్క విలువ సుమారు రూ.10,000 చొప్పున మొత్తం రూ.4 లక్షలుగా అంచనా వేశారు. గంజాయి సాగు, విక్రయాలకు పాల్పడితే చట్టపరమైన చర్యలు తప్పవని బోథ్ సీఐ డి. గురుస్వామి హెచ్చరించారు. గంజాయి సాగు చేసే వారికి ప్రభుత్వ పథకాలు అందకుండా సంబంధిత శాఖలకు సిఫార్సు చేస్తామని తెలిపారు. ఈ ఘటనపై బోథ్ పోలీస్ స్టేషన్‌లో కేసు నమోదు చేసి నిందితున్ని అరెస్టు చేయడం జరిగిందని తెలిపారు.. ఈ కార్యక్రమంలో బోథ్ ఎస్ఐ వి. పురుషోత్తం, పోలీసు సిబ్బంది తదితరులు పాల్గొన్నారు.