పెనుగొండ కామాక్షి అమ్మవారి ఆలయంలో ఘనంగా దుర్గాష్టమి పూజలు

వాసవి పెనుగొండ, సూర్య న్యూస్: శరన్నవరాత్రి ఉత్సవాల్లో భాగంగా ఆదివారం దుర్గాష్టమిని పురస్కరించుకుని పెనుగొండ శ్రీ కామాక్షి అమ్మవారి ఆలయంలో ప్రత్యేక పూజలు భక్తిశ్రద్ధలతో నిర్వహించారు.ఉత్సవాల్లో ఎనిమిదో రోజు సందర్భంగా శ్రీ దుర్గాదేవిని ఆవాహన చేసి శ్రీ లలితా సహస్రనామ కుంకుమ పూజ నిర్వహించారు.ఈ సందర్భంగా ఆలయ మండపంలో ఏర్పాటు చేసిన శ్రీ దేవీ మండపంలో దుర్గాదేవి చిత్రపటాన్ని ప్రత్యేకంగా అలంకరించి పూజలు చేశారు. వేద మంత్రోచ్చారణలు, అమ్మవారి నామస్మరణల మధ్య పూజా కార్యక్రమాలు నిర్వహించగా, భక్తులు అమ్మవారిని దర్శించుకుని పూజల్లో పాల్గొన్నారు.దుర్గాష్టమి పర్వదినం సందర్భంగా ఆలయంలో ఆధ్యాత్మిక వాతావరణం నెలకొంది. శ్రీ కామాక్షి అమ్మవారికి అలంకరణ నిమిత్తం చీరను పెనుగొండకు చెందిన కొండవేటి వెంకట సూర్యనారాయణమూర్తి, శారద దంపతులు సమర్పించారు.దుర్గాష్టమి సందర్భంగా భక్తులు పెద్ద సంఖ్యలో అమ్మవారిని దర్శించుకుని తీర్థప్రసాదాలు స్వీకరించారు.

రిపోర్టర్ : పి.వెంకట్రామయ్య , పెనుగొండ, పశ్చిమ గోదావరి జిల్లా