పదో తరగతి ఫలితాలే లక్ష్యంగా ఇప్పటి నుంచే కార్యాచరణ
మెలియాపుట్టి. నవంబర్ 13. మేజర్ న్యూస్...
పదో తరగతి పబ్లిక్‌ పరీక్షల్లో మెరుగైన ఉత్తీర్ణత సాధించేందుకు విద్యార్థులు చదువుపై ప్రత్యేక దృష్టి సారించాలని ఎంఈఓ పద్మనాభరావు సూచించారు. పరీక్షల సమయం దగ్గర పడిన తర్వాత హడావుడి పడకుండా ఇప్పటి నుంచే పాఠ్యాంశాల వారీగా ప్రణాళిక రూపొందించుకుని ముందుకు సాగాలని హితవు పలికారు.
మెలియాపుట్టి మండలం పెద్దమడిలోని ఏపీటీడబ్ల్యూఆర్‌ఎస్‌ పాఠశాలలో మిషన్‌ మార్చ్‌–2027 కార్యక్రమంలో భాగంగా శుక్రవారం పదో తరగతి విద్యార్థులతో ప్రత్యేక ముఖాముఖి నిర్వహించారు. ఈ సందర్భంగా ఎంఈఓ విద్యార్థులతో మాట్లాడి పరీక్షల సన్నద్ధత, చదువులో ఎదురవుతున్న ఇబ్బందులు, సబ్జెక్టులపై వారికున్న అవగాహన తదితర అంశాలను తెలుసుకున్నారు.
ప్రతి విద్యార్థి అన్ని సబ్జెక్టులపై సమానంగా శ్రద్ధ చూపాలని, కష్టంగా భావించే పాఠ్యాంశాలకు అదనపు సమయం కేటాయించాలని సూచించారు. ప్రతిరోజూ ఒక నిర్దిష్ట సమయపట్టికను రూపొందించుకుని దాని ప్రకారం చదువుకోవాలని తెలిపారు. పాఠశాలలో ఉపాధ్యాయులు బోధించే అంశాలను అదే రోజు ఇంటి వద్ద పునశ్చరణ చేసుకోవడం ద్వారా పాఠ్యాంశాలపై పట్టు సాధించవచ్చన్నారు.
గత సంవత్సరాల ప్రశ్నపత్రాలను నిరంతరం సాధన చేయాలని, ముఖ్యమైన ప్రశ్నలను గుర్తించి పదేపదే చదవాలని సూచించారు. కేవలం చదవడానికే పరిమితం కాకుండా సమాధానాలను సొంతంగా రాసి చూసుకోవాలని, రైటింగ్‌ ప్రాక్టీస్‌కు ప్రాధాన్యమివ్వాలని చెప్పారు. ఏ అంశంలోనైనా సందేహాలు ఉంటే ఉపాధ్యాయులను సంప్రదించి వెంటనే నివృత్తి చేసుకోవాలని వివరించారు.పరీక్షలంటే భయాందోళనలకు గురికాకుండా ఆత్మవిశ్వాసంతో ఎదుర్కోవాలని, క్రమశిక్షణ, పట్టుదల, నిరంతర సాధనతో అనుకున్న లక్ష్యాన్ని చేరుకోవచ్చని పేర్కొన్నారు. మిషన్‌ మార్చ్‌–2027 లక్ష్యానికి అనుగుణంగా ప్రతి విద్యార్థి ఉత్తమ ఫలితాల సాధనకు కృషి చేయాలని ఆకాంక్షించారు. విద్యార్థులందరూ మంచి మార్కులతో ఉత్తీర్ణులై పాఠశాలకు, తల్లిదండ్రులకు, ఉపాధ్యాయులకు మంచి పేరు తీసుకురావాలని ఎంఈఓ సూచించారు.
