ఓటరు కార్డు లేకపోయినా ఓటు వేయవచ్చు.. ప్రత్యామ్నాయంగా 20 రకాల గుర్తింపు కార్డులకు అనుమతి!

నెల్లూరు కలెక్టరేట్, మేజర్ న్యూస్ :  నవంబర్ 1న స్థానిక సంస్థల ఎన్నికల పోలింగ్.. ఓటర్లు తప్పనిసరిగా గుర్తింపు కార్డు తీసుకురావాలి
స్థానిక సంస్థల ఎన్నికల పోలింగ్ నవంబర్ 1న జరగనున్న నేపథ్యంలో ఓటర్లు తమ ఓటు హక్కును స్వేచ్ఛగా వినియోగించుకునేందుకు ఎన్నికల సంఘం కీలక వెసులుబాటు కల్పించింది. ఓటరు గుర్తింపు కార్డు (EPIC) లేని వారు ప్రత్యామ్నాయంగా 20 రకాల ఫొటో గుర్తింపు పత్రాల్లో ఏదైనా ఒకదాన్ని చూపించి ఓటు వేయవచ్చని జిల్లా ఎన్నికల అధికారి, కలెక్టర్ హిమాన్షు శుక్ల తెలిపారు.

ఈ మేరకు ఆయన శుక్రవారం విడుదల చేసిన ప్రకటనలో ఓటర్లు పోలింగ్ కేంద్రానికి వెళ్లేటప్పుడు తప్పనిసరిగా గుర్తింపు పత్రాన్ని వెంట తీసుకురావాలని సూచించారు.

అనుమతించిన 20 రకాల గుర్తింపు పత్రాలు ఇవే..

1. ఆధార్ కార్డు.
2. పాస్‌పోర్ట్.
3. డ్రైవింగ్ లైసెన్స్.
4. ఆదాయపు పన్ను శాఖ జారీ చేసిన పాన్ కార్డు.
5. కేంద్ర, రాష్ట్ర ప్రభుత్వాలు, ప్రభుత్వ రంగ సంస్థలు, స్థానిక సంస్థలు, ప్రభుత్వ లిమిటెడ్ కంపెనీలు ఉద్యోగులకు జారీ చేసిన ఫొటో గుర్తింపు కార్డులు.
6. ఫొటోతో కూడిన పెన్షన్ పేమెంట్ ఆర్డర్.
7. మాజీ సైనికుల పెన్షన్ పుస్తకం.
8. వృద్ధాప్య, వితంతు పెన్షన్ పత్రాలు.
9. ఫొటోతో కూడిన పట్టాదారు పాస్‌బుక్‌లు, రిజిస్టర్డ్ ఆస్తి పత్రాలు.
10. ప్రభుత్వ రంగ బ్యాంకులు, పోస్టాఫీసులు, APCOB, DCCBలు జారీ చేసిన ఫొటో పాస్‌బుక్‌లు.
11. కిసాన్ పాస్‌బుక్‌లు.
12. బ్యాంకులు జారీ చేసిన ఫొటోతో కూడిన ఏటీఎం కార్డులు.
13. ఫొటోతో కూడిన రేషన్ కార్డులు.
14. నేషనల్ పాపులేషన్ రిజిస్టర్ (NPR) కింద RGI జారీ చేసిన స్మార్ట్ కార్డులు.
15. ఉపాధి హామీ పథకం జాబ్ కార్డు.
16. సంబంధిత అధికార సంస్థ జారీ చేసిన ఫొటోతో కూడిన SC, ST, BC ధ్రువీకరణ పత్రాలు.
17. ఫొటోతో కూడిన స్వాతంత్ర్య సమరయోధుల గుర్తింపు కార్డులు.
18. ఫొటోతో కూడిన ఆయుధ లైసెన్సులు.
19. సంబంధిత అధికారి జారీ చేసిన ఫొటోతో కూడిన దివ్యాంగ ధ్రువీకరణ పత్రం.
20. బార్ కౌన్సిళ్లు, కార్మిక మంత్రిత్వ శాఖ, శాసనసభ, శాసనమండలి, లోక్‌సభ, రాజ్యసభ సచివాలయాలు జారీ చేసిన సంబంధిత ఫొటో గుర్తింపు, సభ్యత్వ, ఆరోగ్య బీమా స్మార్ట్ కార్డులు.

ఓటరు గుర్తింపు కార్డు అందుబాటులో లేకపోయినా ఆందోళన చెందాల్సిన అవసరం లేదని, ఎన్నికల సంఘం అనుమతించిన ప్రత్యామ్నాయ గుర్తింపు పత్రాల్లో ఏదైనా ఒకదాన్ని పోలింగ్ కేంద్రంలో చూపించి ఓటు హక్కును వినియోగించుకోవాలని కలెక్టర్ హిమాన్షు శుక్ల ప్రజలకు విజ్ఞప్తి చేశారు.

ప్రజాస్వామ్యంలో ఓటు హక్కు ఎంతో విలువైనదని, అర్హులైన ప్రతి ఒక్కరూ నవంబర్ 1న జరిగే పోలింగ్‌లో పాల్గొని తమ ఓటు హక్కును వినియోగించుకోవాలని ఆయన కోరారు.