ఓటర్ల జాబితా నుంచి తొలగించిన పేర్లను పునరుద్ధరించాలి వామపక్షాలు డిమాండ్

ఓటర్ల జాబితా నుంచి తొలగించిన పేర్లను పునరుద్ధరించాలి

సీఈసీ జ్ఞానేశ్ కుమార్ రాజీనామా చేయాలి: వామపక్షాల డిమాండ్

భీమవరం, మేజర్ న్యూస్:

ఓటర్ల జాబితా నుంచి తొలగించిన పేర్లను పునరుద్ధరించాలని, ప్రధాన ఎన్నికల కమిషనర్‌ జ్ఞానేశ్ కుమార్ రాజీనామా చేయాలని వామపక్ష పార్టీల నేతలు డిమాండ్ చేశారు. ఈ మేరకు శనివారం భీమవరం కొత్త బస్టాండ్ వద్ద సీపీఎం, సీపీఐ, ఎంసీపీఐయూ, ఫార్వర్డ్ బ్లాక్ ఆధ్వర్యంలో నిరసన చేపట్టారు.

సీపీఎం జిల్లా కార్యదర్శి జేఎన్‌వీ గోపాలన్ మాట్లాడుతూ ఎస్‌ఐఆర్‌ పేరుతో అర్హులైన ఓటర్ల పేర్లను తొలగిస్తున్నారని ఆరోపించారు. మ్యాపింగ్‌ కాలేదనే కారణంతో తొలగించిన ఓట్లను పునరుద్ధరించాలని డిమాండ్ చేశారు. ఎన్నికల కమిషన్ ఏకపక్ష నిర్ణయాలు తీసుకుంటోందని ఆరోపిస్తూ, సీఈసీ జ్ఞానేశ్ కుమార్ రాజీనామా చేయాలని కోరారు.సీపీఐ జిల్లా కార్యదర్శి కొనాల భీమారావు మాట్లాడుతూ తొలగించిన ఓట్లను వెంటనే పునరుద్ధరించాలని డిమాండ్ చేశారు. లేనిపక్షంలో ఉద్యమాన్ని ఉధృతం చేస్తామని హెచ్చరించారు. కార్యక్రమంలో ఫార్వర్డ్ బ్లాక్ జిల్లా కార్యదర్శి దండు శ్రీనివాసరాజు, ఎంసీపీఐయూ నాయకులు కొల్లా బత్తుల మహంకాళి, వామపక్ష పార్టీల నాయకులు, కార్యకర్తలు పాల్గొన్నారు.

 శ్రీనివాస్ భీమవరం