నూతన ప్రభుత్వ ఆసుపత్రి నిర్మాణానికి శంకుస్థాపన

రాయవరం మేజర్ న్యూస్ : రాయవరం మండలం, రాయవరం గ్రామంలో ప్రజలకు మెరుగైన ఆరోగ్య సేవలు అందించే లక్ష్యంతో నూతన ప్రభుత్వ ఆసుపత్రి నిర్మాణ పనులకు శనివారం ఘనంగా శంఖుస్థాపన నిర్వహించారు. 15వ ఆర్థిక సంఘం నిధులు రూ.1.93 కోట్ల వ్యయంతో ఈ ఆసుపత్రిని నిర్మించనున్నారు. ఈ కార్యక్రమానికి రాష్ట్ర అంచనాల కమిటీ చైర్మన్, ఎమ్మెల్యే వేగుళ్ళ జోగేశ్వరరావు  ముఖ్య అతిథిగా విచ్చేసి, శాస్త్రోక్తంగా భూమి పూజ చేసి శంఖుస్థాపన చేశారు. ఈ సందర్భంగా ఎమ్మెల్యే వేగుళ్ళ మాట్లాడుతూ గతంలో ఉన్న పాత ఆసుపత్రి భవనం పూర్తి శిథిలావస్థకు చేరుకోవడంతో ప్రజలు, రోగులు తీవ్ర ఇబ్బందులు ఎదుర్కొన్నారని, అందుకే ఆ పాత భవనాన్ని తొలగించి రూ.1.93 కోట్లతో ఆధునిక వసతులతో  నూతన భవనాన్ని నిర్మిస్తున్నామని తెలిపారు. రాయవరం పరిసర ప్రాంత ప్రజలకు ఆధునిక వైద్య సేవలు అందుబాటులోకి తీసుకురావడమే తమ ధ్యేయమని పేర్కొన్నారు. పాత భవనం స్థానంలో కొత్త ఆసుపత్రి రూపుదిద్దుకోనుండటంతో స్థానిక ప్రజలు హర్షం వ్యక్తం చేశారు. ఈ కార్యక్రమంలో టిడిపి నాయకులు ఉండవల్లి రాంబాబు, వల్లూరి శ్రీనివాస్, చల్లా సత్యనారాయణ, బర్ల రాజు, నేతల సురేష్, కందుకూరి గంగరాజు, ఇందుకుమిల్లి అరుణ్ కుమార్, జనసేన నాయకులు దేవిశెట్టి కోటేశ్వరరావు, బీర వరప్రసాద్, తూము చక్రధరరావు, పట్నాల జగదీష్, హాస్పటల్ సిబ్బంది, కూటమి నాయకులు, కార్యకర్తలు పాల్గొన్నారు