నేటి చిన్ని ఆలోచనలే రేపటి ఆవిష్కరణలకు పునాది : అన్నమయ్య జిల్లా డీఈవో సుబ్రహ్మణ్యం : బాలల జాతీయ సైన్స్ కాంగ్రెస్ విజేతలకు అభినందనలు
మదనపల్లె టౌన్,మేజర్ న్యూస్ : ఆంధ్రప్రదేశ్ రాష్ట్ర శాస్త్ర సాంకేతిక మండలి ఆధ్వర్యంలో నిర్వహించిన జిల్లాస్థాయి ప్రాజెక్టుల పోటీల్లో విజయం సాధించిన బాలశాస్త్రవేత్తలకు గురువారం జిల్లా విద్యాశాఖ అధికారి కార్యాలయంలో అభినందన కార్యక్రమం నిర్వహించారు.ఈ సందర్భంగా బాలల జాతీయ సైన్స్ కాంగ్రెస్-2026 విజేతలకు జిల్లా విద్యాశాఖ అధికారి డాక్టర్ సుబ్రమణ్యం,ఏపీసీ డాక్టర్ అనురాధ అభినందనలు తెలిపారు.రాష్ట్రస్థాయి ప్రాజెక్టుల ప్రదర్శనలో విద్యార్థులు మరింత ప్రతిభ కనబరచాలని,అన్నమయ్య జిల్లా నుంచి అత్యధిక ప్రాజెక్టులు రాష్ట్రస్థాయికి ఎంపికయ్యేలా కృషి చేయాలని సూచించారు.నేటి చిన్నచిన్న ఆలోచనలే రేపటి గొప్ప ఆవిష్కరణలకు పునాదులని పేర్కొంటూ,విద్యార్థుల్లో శాస్త్రీయ దృక్పథం,సృజనాత్మకత,పరిశోధనా ఆసక్తిని పెంపొందించాలని తెలిపారు.వైజ్ఞానిక రంగ అభివృద్ధికి కేంద్ర,రాష్ట్ర ప్రభుత్వాలు పాఠశాలలకు అవసరమైన సహాయ,సహకారాలు అందిస్తున్నాయని వివరించారు.అనంతరం విజేతలైన బాలశాస్త్రవేత్తలకు సర్టిఫికెట్లు,మెమెంటోలు అందజేశారు.రాష్ట్రస్థాయి బాలల జాతీయ సైన్స్ కాంగ్రెస్ పోటీలు డిసెంబర్ మొదటి వారంలో నిర్వహించనున్నట్లు తెలిపారు.ఈ కార్యక్రమంలో జిల్లా బాలల జాతీయ సైన్స్ కాంగ్రెస్ కో-ఆర్డినేటర్ ఎం.భాస్కరన్,సైన్స్ అధికారి శ్రీధర్,అకడమిక్ కో-ఆర్డినేటర్ పి.ఎల్.ఎన్ శాస్త్రి,రిసోర్స్ పర్సన్లు,గైడ్ టీచర్లు,బాల శాస్త్రవేత్తలు పాల్గొన్నారు.
రిపోర్టర్ : కే.ఈశ్వర్ రెడ్డి,మదనపల్లి నియోజకవర్గం ఇంచార్జి