నగరాన్ని సుందరీకరణగా మారుస్తాం

చిత్తూరు ప్రతినిధి మేజర్ న్యూస్: నగరంలో పలు వార్డుల్లో నూతనంగా నిర్మించిన సిమెంట్ రోడ్లను ఎమ్మెల్యే గురజాల జగన్ మోహన్ ప్రారంభించారు. సోమవారం సాయంత్రం 9వ వార్డు లక్ష్మీ నగర్ కాలనీ ఎక్స్టెన్షన్ లో రూ.10 లక్షలతో నిర్మించిన సిమెంట్ రోడ్డును ప్రారంభించారు. అనంతరం ఇరువారం పరిధిలో.. వివిధ వీధుల్లో నగరపాలక సంస్థ, ఎంపీ నిధులు, ఐఓసీఎల్ సిఆర్ఎస్ నిధులు మొత్తంగా రూ.1.80 కోట్ల నిధులతో చేపట్టిన నాలుగు సిమెంట్ రోడ్లు, బరియల్ గ్రౌండ్ చాపెల్, వీధిలైట్లు, బోరు మోటారు, మినీ కమ్యూనిటీ హాల్ నిర్మాణాలకు భూమి పూజ, ప్రారంభోత్సవాలు చేశారు. ఈ సందర్భంగా ఎమ్మెల్యే మాట్లాడుతూ.. చిత్తూరు నగరంలో అభివృద్ధి పనులు వేగవంతం చేశామని, స్థానిక సంస్థల్లో ప్రజల మద్దతుతో రానున్న రోజుల్లో మరింతగా అభివృద్ధి పనులు చేస్తామని చెప్పారు. గడిచిన రెండేళ్లలో కూటమి పార్టీ ఆధ్వర్యంలో నగరంలోని అన్ని వార్డుల పరిధిలో అభివృద్ధి కార్యక్రమాలు చేపట్టామన్నారు. అభివృద్ధిని చూసి కూటమి పార్టీ అభ్యర్థులకు ఓటు వేయాలని కోరారు. కార్యక్రమంలో.. క్లస్టర్, డివిజన్ ఇన్చార్జులు, మాజీ కార్పొరేటర్లు, స్థానిక కూటమి పార్టీల నాయకులు, తెదేపా కమిటీల సభ్యులు, కార్యకర్తలు పాల్గొన్నారు.