పట్టభద్రుల ఎమ్మెల్సీ ఓటరు నమోదుకు అర్హులైన వారు దరఖాస్తు చేసుకోవాలి: తహసీల్దార్ విజయ్ కుమార్

పూడూరు, మేజర్ న్యూస్ (అక్టోబర్ 13): మహబూబ్‌నగర్–రంగారెడ్డి–హైదరాబాద్ పట్టభద్రుల ఎమ్మెల్సీ నియోజకవర్గానికి సంబంధించి ఓటరు నమోదు ప్రక్రియ ప్రారంభమైందని పూడూరు తహసీల్దార్ విజయ్ కుమార్ తెలిపారు. అర్హులైన పట్టభద్రులందరూ తమ పేర్లను ఓటరు జాబితాలో నమోదు చేసుకోవాలని ఆయన సూచించారు. ప్రజాస్వామ్య ప్రక్రియలో పట్టభద్రులు భాగస్వాములు కావాలంటే ఓటు హక్కును వినియోగించుకోవడంతో పాటు ఓటరు జాబితాలో పేరు నమోదు చేసుకోవడం ముఖ్యమన్నారు.2023 అక్టోబర్ 31వ తేదీ నాటికి ఏదైనా గుర్తింపు పొందిన డిగ్రీ పూర్తి చేసిన పట్టభద్రులు ఈ ఓటరు నమోదు కోసం దరఖాస్తు చేసుకోవడానికి అర్హులని పేర్కొన్నారు. దరఖాస్తు సమయంలో డిగ్రీ లేదా ప్రొవిజనల్ సర్టిఫికెట్, ఆధార్ కార్డు, పాస్‌పోర్ట్ సైజు ఫొటో, నివాస ధ్రువీకరణ పత్రం, ఓటరు గుర్తింపు కార్డు (EPIC) జిరాక్స్ ప్రతులు లేదా సాఫ్ట్ కాపీలను సిద్ధంగా ఉంచుకోవాలని సూచించారు.అర్హులైన వారు ఫారం-18 సమర్పించి ఆన్‌లైన్‌లో దరఖాస్తు చేసుకోవచ్చని తెలిపారు. ఇందుకోసం తెలంగాణ ప్రధాన ఎన్నికల అధికారి అధికారిక వెబ్‌సైట్ https://ceotserms2.telangana.gov.in/MLC/Form18.aspx ను సందర్శించాలని సూచించారు. అలాగే సమీపంలోని ఓటరు నమోదు కేంద్రాలను సంప్రదించి కూడా దరఖాస్తు చేసుకోవచ్చన్నారు.గతంలో పట్టభద్రుల ఎమ్మెల్సీ ఓటరుగా నమోదై ఉన్నవారు సైతం ప్రస్తుత నమోదు ప్రక్రియలో మళ్లీ కొత్తగా దరఖాస్తు చేసుకోవాల్సి ఉంటుందని స్పష్టం చేశారు. అర్హులైన పట్టభద్రులు ఈ విషయాన్ని గమనించి తమ పేర్లను నమోదు చేసుకోవడంతో పాటు, తమ స్నేహితులు, కుటుంబ సభ్యుల్లోని అర్హులైన పట్టభద్రులకు కూడా అవగాహన కల్పించాలని తహసీల్దార్ విజయ్ కుమార్ కోరారు.

రిపోర్టర్: శ్రీరాములు,పూడూరు, వికారాబాద్ జిల్లా.