విద్యుత్ కోతలతో ఎండుతున్న ఆలుగడ్డ పంట.. జనరేటర్‌తో నీటి తడి పెడుతున్న రైతు.!
మర్పల్లి,మేజర్ న్యూస్:విద్యుత్ సరఫరాలో అంతరాయాలతో పంటలు ఎండిపోతుండటంతో రైతులు తీవ్ర ఇబ్బందులు ఎదుర్కొంటున్నారు. బూచన్‌పల్లి గ్రామానికి చెందిన రైతు బోయిని నర్సింలు తనకున్న రెండు ఎకరాల పొలంలో ఆలుగడ్డ పంట సాగు చేశారు. అయితే, ప్రభుత్వం నుంచి విద్యుత్ సరఫరా సక్రమంగా లేకపోవడంతో పంటకు అవసరమైన నీరు అందక ఆలుగడ్డ పంట ఎండిపోయే పరిస్థితి ఏర్పడింది.కష్టపడి సాగు చేసిన పంటను కాపాడుకునేందుకు రైతు నర్సింలు ప్రత్యామ్నాయ మార్గాన్ని ఆశ్రయించారు. రోజుకు రూ.2,000 అద్దె చెల్లించి జనరేటర్‌ను తీసుకొచ్చి గత మూడు రోజులుగా పంటకు నీటిని అందిస్తున్నారు. ఇప్పటికే సాగు కోసం పెట్టుబడులు పెట్టిన రైతుకు జనరేటర్ అద్దె అదనపు భారంగా మారింది. పంటను కాపాడుకునేందుకు తప్పనిసరి పరిస్థితుల్లో అధిక ఖర్చు భరించాల్సి వస్తోందని రైతు ఆవేదన వ్యక్తం చేస్తున్నారు.ప్రభుత్వం ఇప్పటికైనా రైతుల కష్టాలను గుర్తించి వ్యవసాయానికి 24 గంటల ఉచిత విద్యుత్‌ను సక్రమంగా సరఫరా చేయాలని రైతు కోరుతున్నారు. విద్యుత్ అంతరాయాల కారణంగా పంటలు నష్టపోకుండా అధికారులు తగిన చర్యలు తీసుకుని, రైతులను ఆదుకోవాలని విజ్ఞప్తి చేస్తున్నారు.
రిపోర్టర్: రాములు, మర్పల్లి, వికారాబాద్ జిల్లా.
