నగర పంచాయతీ ఎన్నికలకు సర్వం సిద్ధం

పాలకొండ, సూర్య : నగర పంచాయతీ ఎన్నికలకు సర్వం సిద్ధమైనట్లు ఆర్ ఓ, సబ్ కలెక్టర్ పవార్ స్వప్నిల్ జగన్నాద్ తెలిపారు. నవంబర్ 1వ తేదీ ఆదివారం ఉదయం 7.00 గంటలు నుంచే బ్యాలెట్ పత్రాల ద్వారా ఓటర్లు తమ ఓటు హక్కును వినియోగించుకోవచ్చని అన్నారు. పాలకొండ నగర పంచాయతీ పరిధిలో మొత్తం 23,466 మంది ఓటర్లు ఉండగా, వీరిలో 11,453 మంది పురుషులు, 12,012 మంది మహిళలు, ఒకరు ఇతర ఓటరు ఉన్నట్లు పేర్కొన్నారు. మొత్తం 28 వార్డులకు సంబంధించి 30 పోలింగ్ కేంద్రాలను ఏర్పాటు చేశారని, ఎన్నికల నిర్వహణ కోసం 59 బ్యాలెట్ బాక్సులను సిద్ధం చేయడంతో పాటు 30 మంది ఎన్నికల అధికారులు (ఈఓలు), 30 సహాయ ఎన్నికల అధికారులు (ఏఈఓలు) నియమించినట్లు చెప్పారు. 6గురు ఏఈఓలను రిజర్వులో ఉంచారు. ఎన్నికల విధుల నిర్వహణ సజావుగా జరిగేందుకు మున్సిపాలిటీని 5 రూట్లు, 3 జోన్లుగా విభజించారని, మొత్తం 120 మంది పోలింగ్ సిబ్బందిని కేటాయించగా, వీరిలో  ప్రిసైడింగ్ అధికారులు, ఇతర పోలింగ్ సిబ్బంది ఉన్నారన్నారు. ఎన్నికల ప్రక్రియను ప్రశాంతంగా, పారదర్శకంగా నిర్వహించేందుకు సర్వం సిద్దమైందని వివరించారు.
ఎన్నికల సామగ్రి పంపిణీ పరిశీలన
పాలకొండ నగర పంచాయతీ సాధారణ ఎన్నికల నేపథ్యంలో శనివారం ఎన్నికల సిబ్బందికి సామగ్రిని పంపిణీ చేశారు. ఎన్నికల అబ్జర్వర్ ఎస్.చిన్న రాముడు, సబ్ కలెక్టర్ పవర్ స్వప్నిల్ జగన్నాథ్ ఏర్పాట్లను పరిశీలించారు. బ్యాలెట్ బాక్సుల సీలింగ్, పోలింగ్ ప్రక్రియపై అధికారులకు సూచనలు చేశారు. ఎన్నికలను ప్రశాంతంగా, పారదర్శకంగా నిర్వహించాలని ఆదేశించారు. కార్యక్రమంలో మున్సిపల్ కమిషనర్ పాల్గొన్నారు.