నామినేషన్ కేంద్ర వద్ద పోలీసు భద్రతపై పరిశీలన

ముత్తుకూరు, మేజర్ న్యూస్ :   స్థానిక సంస్థల ఎన్నికల నేపథ్యంలో ముత్తుకూరులోని ఎంపీటీసీ నామినేషన్ కేంద్రం వద్ద ఏర్పాటు చేసిన పోలీసు భద్రతా ఏర్పాట్లను రూరల్ డీఎస్పీ జి. శ్రీనివాసరావు పరిశీలించారు. నామినేషన్ల స్వీకరణ ప్రక్రియ జరుగుతున్న కేంద్రం వద్ద భద్రతా విధులను సమీక్షించారు.  ఈ సందర్భంగా స్థానిక సీఐ రఘుబాబు, ఎస్సైలు కొండారెడ్డి, జేపీ శ్రీనివాసరెడ్డితో డీఎస్పీ మాట్లాడి భద్రతా ఏర్పాట్ల వివరాలను తెలుసుకున్నారు. నామినేషన్ల ప్రక్రియ సజావుగా జరిగేలా అవసరమైన చర్యలు తీసుకోవాలని సూచించారు.  ఎన్నికల్లో పోటీ చేస్తున్న అభ్యర్థులకు ఎన్నికల నిబంధనలపై అవగాహన కల్పించిన అనంతరం, వారిని నామినేషన్ కేంద్రానికి పంపించాలని పోలీసు అధికారులకు డీఎస్పీ సూచించారు. ఎన్నికల ప్రక్రియ ప్రశాంతంగా, క్రమబద్ధంగా జరిగేలా అప్రమత్తంగా విధులు నిర్వహించాలని ఆదేశించారు.