telangana
తుమ్మిడిహెట్టి, డిండి, అచ్చంపేట పనుల వేగవంతానికి ఆదేశాలు
హైదరాబాద్: రాష్ట్రంలోని పలు సాగునీటి ప్రాజెక్టుల పురోగతిపై ముఖ్యమంత్రి ఎ. రేవంత్ రెడ్డి ఉన్నతాధికారులతో కీలక సమీక్షా సమావేశం నిర్వహించారు. తుమ్మిడిహెట్టి, డిండి, అచ్చంపేట ఎత్తిపోతల పథకాలపై అధికారులతో సమగ్రంగా చర్చించిన సీఎం, ప్రాజెక్టుల నిర్మాణ వేగాన్ని పెంచాలని ఆదేశించారు. తుమ్మిడిహెట్టి ప్రాజెక్టు నిర్మాణంపై పొరుగు రాష్ట్రమైన మహారాష్ట్రతో చర్చలకు సిద్ధం కావాలని, ఈ నెల 23వ తేదీ తర్వాత చర్చలకు పిలిచే అవకాశం ఉందని తెలిపారు. 152 మీటర్ల ఎత్తుతో బ్యారేజీ నిర్మాణ ప్రతిపాదనల ద్వారా ఉమ్మడి ఆదిలాబాద్ జిల్లాలో 2 లక్షల ఎకరాలకు సాగునీరు అందించడమే ప్రభుత్వ లక్ష్యమని స్పష్టం చేశారు. అలాగే డిండి ప్రాజెక్టుకు 0.5 టీఎంసీలు, అచ్చంపేట ఎత్తిపోతలకు 0.1 టీఎంసీల నీటిని కేటాయించాలని, ఏదుల రిజర్వాయర్‌కు అదనంగా 0.6 టీఎంసీల నీటిని తరలించేలా పంప్‌హౌస్‌లు, పంపుల పనులను వెంటనే చేపట్టాలని అధికారులను ఆదేశించారు.
