telangana
బీసీ-ఏ కేటగిరీ పరిరక్షణకై సమరం - 7% రిజర్వేషన్లు హరించుకుపోతాయని తీవ్ర ఆందోళన
సూర్య ఉట్నూర్ : దశాబ్దాలుగా సామాజికంగా, ఆర్థికంగా, విద్యాపరంగా తీవ్ర తీవ్ర వివక్షకూ, వెనుకబాటుతనానికి గురవుతున్న అత్యంత వెనుకబడిన, సంచార మరియు చేతివృత్తుల కులాల హక్కులను కాలరాసే ప్రయత్నాలను సహించేది లేదని వివిధ బీసీ సంఘాల నేతలు స్పష్టం చేశారు. సాపేక్షంగా మెరుగైన జనాభా, ఆర్థిక బలం, రాజకీయ ప్రాబల్యం కలిగిన బీసీ-డీ పరిధిలోని పెద్ద కులాలను బీసీ-ఏ కేటగిరీలోకి మార్చే ప్రతిపాదనలను వారు తీవ్రంగా నిరసించారు.
ఒకవేళ ఈ మార్పులు చేపడితే, బీసీ-ఏ వర్గాలకు కేటాయించిన స్వల్ప 7% రిజర్వేషన్ ఫలాలు పూర్తిగా హరించుకుపోతాయని, అత్యంత పేదరికంలో ఉన్న చిన్న కులాల ఉనికికే ముప్పు వాటిల్లుతుందని నాయకులు హెచ్చరించారు.
- ‘పోటీపడే శక్తి మాకు లేదు.. అవకాశాలు కొల్లగొట్టడమే : ఈ సందర్భంగా నిర్వహించిన సమావేశంలో ప్రతినిధులు మాట్లాడుతూ కీలక అంశాలను సభ దృష్టికి తీసుకువచ్చారు. సంచార, చేతివృత్తుల తీవ్ర వెనుకబాటు: బీసీ-ఏ జాబితాలో నిగూఢమైన వెనుకబాటుతో, ఆధునిక వసతులకు దూరంగా కులవృత్తులపైనే ఆధారపడి జీవిస్తున్న కులాలు ఉన్నాయి. అసమాన పోటీ.జనాభా ఆధిక్యత, సాంకేతిక, ఆర్థిక వనరులు పుష్కలంగా ఉన్న బీసీ-డీ పెద్ద కులాలను ఈ కేటగిరీలోకి తెస్తే, విద్యా, ఉద్యోగ పోటీలో చిన్న కులాలు ఎప్పటికీ నిలదొక్కుకోలేవు.
- సామాజిక న్యాయానికి గొడ్డలిపెట్టు: కేవలం రాజకీయ ప్రయోజనాల కోసం లేదా ఒత్తిళ్లకు తలొగ్గి కులాల వర్గీకరణ పరిమితులను సవరిస్తే అసలైన అట్టడుగు వర్గాలకు రాజ్యాంగం కల్పించిన సామాజిక న్యాయం అందకుండా పోతుందని ఆవేదన వ్యక్తం చేశారు.
- ముఖ్య నాయకుల హాజరు & డిమాండ్లు:ఈ ఆందోళన సమావేశంలో పలు బీసీ సంఘాల ముఖ్యాధికారులు, సామాజిక విశ్లేషకులు మరియు నాయకులు పాల్గొన్నారు. కార్యక్రమంలో వెంకటేష్ కాల్వ, రవి ఓలెపు, భుజంగరావు, బింగి వెంకటేష్, తన్నీరు సతీష్, బొడ్డు నరసయ్య, రాములు, బి. మల్లేష్, రాచకొండ ప్రవీణ్, పందిరి నర్సయ్య తదితరులు పాల్గొని ప్రసంగించారు.
- ప్రధాన డిమాండ్లు: బీసీ-ఏ జాబితాలోకి ఇతర వర్గాలను లేదా పెద్ద కులాలను ఎట్టి పరిస్థితుల్లోనూ చేర్చకూడదు. శాస్త్రీయమైన పద్ధతిలో కుల గణన (క్యాస్ట్ సెన్సుస్ ) చేపట్టి, జనాభా ప్రాతిపదికన ప్రతి గ్రూపునకు రిజర్వేషన్ల శాతాన్ని పెంచాలి. అత్యంత వెనుకబడిన సంచార జాతులకు ప్రత్యేక రక్షణ చట్టం మరియు ప్రత్యేక ఆర్థిక ప్యాకేజీలు అమలు చేయాలి.
