మందమర్రి ఆరోగ్య కేంద్రాన్ని తనిఖీ చేసిన డీఎంహెచ్‌ఓ
సూర్య , మందమర్రి : ప్రాథమిక ఆరోగ్య కేంద్రం పరిధిలోని ఆయుష్మాన్ ఆరోగ్య ఉపకేంద్రాన్ని జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్, ఉప జిల్లా వైద్య ఆరోగ్యశాఖ అధికారి డాక్టర్ సుధాకర్ నాయక్‌తో కలిసి ఆకస్మికంగా తనిఖీ చేశారు. ఈ సందర్భంగా వైద్య సేవలు, రికార్డులను పరిశీలించి సిబ్బందికి పలు సూచనలు చేశారు. జిల్లాలో ఈ నెల 23 నుంచి 31వ తేదీ వరకు నిర్వహిస్తున్న క్యాచ్‌అప్ వ్యాక్సినేషన్ కార్యక్రమంలో టీకాలు పొందని పిల్లలందరికీ టీకాలు వేయించాలని ఆదేశించారు. కుష్ఠు వ్యాధి నివారణ సర్వేను ముమ్మరం చేయడంతో పాటు మలేరియా, డెంగ్యూ, చికున్‌గున్యా వంటి వ్యాధులు ప్రబలకుండా పరిసరాల పరిశుభ్రతపై దృష్టి సారించాలన్నారు. వైద్యులు సమయపాలన పాటిస్తూ ప్రజలకు అందుబాటులో ఉండాలని సూచించారు. అనంతరం అంగన్‌వాడీ కేంద్రాన్ని సందర్శించి గర్భిణులు, పిల్లలకు అందిస్తున్న పౌష్టికాహారాన్ని పరిశీలించారు. ఈ కార్యక్రమంలో వైద్యాధికారి డాక్టర్ లక్ష్మీప్రసన్న, జిల్లా మాస్ మీడియా అధికారి బుక్క వెంకటేశ్వర్, ఆరోగ్య సిబ్బంది, ఆశా కార్యకర్తలు తదితరులు పాల్గొన్నారు.
