మురసు తుపాను నేపథ్యంలో అన్ని శాఖలు అప్రమత్తంగా ఉండాలి

విజయవాడ, మేజర్ న్యూస్: మురసు తుపాను నేపథ్యంలో ఎన్టీఆర్ జిల్లాలోని అన్ని శాఖల అధికారులు పూర్తి అప్రమత్తంగా ఉండాలని జిల్లా కలెక్టర్ డాక్టర్ జి. లక్ష్మీశ ఆదేశించారు. ప్రజల ప్రాణ, ఆస్తి రక్షణకు ప్రాధాన్యతనిస్తూ ముందస్తు జాగ్రత్త చర్యలు చేపట్టాలని సూచించారు. అవసరమైన పునరావాస కేంద్రాలను తక్షణమే సిద్ధం చేయాలని, లోతట్టు ప్రాంతాలు, వరద ముప్పు ఉన్న ప్రాంతాలపై నిరంతర పర్యవేక్షణ చేపట్టాలని ఆదేశించారు. తుపాను ప్రభావంతో రహదారులపై చెట్లు కూలితే వెంటనే తొలగించేలా, విద్యుత్ సరఫరాలో అంతరాయం ఏర్పడితే సత్వరమే పునరుద్ధరించేలా సంబంధిత శాఖలు సిద్ధంగా ఉండాలని సూచించారు. అత్యవసర వైద్య సేవలకు అవసరమైన ఏర్పాట్లు చేయాలని స్పష్టం చేశారు. జిల్లా కమాండ్ కంట్రోల్ కేంద్రానికి అనుసంధానంగా డివిజన్, మండల స్థాయిల్లో కమాండ్ కంట్రోల్ కేంద్రాలను క్రియాశీలం చేయాలని, క్షేత్రస్థాయి సమాచారాన్ని ఎప్పటికప్పుడు జిల్లా కేంద్రానికి చేరవేయాలని ఆదేశించారు. స్వర్ణ గ్రామ, వార్డు కార్యాలయాలను 24 గంటల పాటు అందుబాటులో ఉంచి ప్రజల సమస్యలకు తక్షణమే స్పందించాలని తెలిపారు. అన్ని శాఖల అధికారులు సమన్వయంతో పనిచేస్తూ తుపాను ప్రభావం తగ్గే వరకు అప్రమత్తంగా ఉండాలని కలెక్టర్ స్పష్టం చేశారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.