మున్సిపల్ ఎన్నికల పోలింగ్ విధులకు హాజరయ్యే ఉద్యోగులకు నవంబర్ 2న ఆన్‌డ్యూటీ సౌకర్యం కల్పించాలి.. ఏపీ స్టేట్ ఎంప్లాయిస్ అసోసియేషన్ రాష్ట్ర అధ్యక్షులు నల్లపల్లి విజయ్ భాస్కర్ డిమాండ్
అనంతపురం ప్రతినిధి మేజర్ న్యూస్ :- ఆంధ్రప్రదేశ్ రాష్ట్రంలో నవంబర్ 1న నిర్వహించనున్న మున్సిపల్ ఎన్నికల పోలింగ్ విధుల కోసం నియమించబడిన ఉద్యోగులకు నవంబర్ 2వ తేదీన ఆన్‌డ్యూటీ సౌకర్యం కల్పించాలని ఆంధ్రప్రదేశ్ స్టేట్ ఎంప్లాయిస్ అసోసియేషన్ రాష్ట్ర అధ్యక్షులు నల్లపల్లి విజయ్ భాస్కర్ రాష్ట్ర ప్రభుత్వాన్ని, ఎన్నికల అధికారులను డిమాండ్ చేశారు. మున్సిపల్ ఎన్నికల పోలింగ్ విధుల్లో పాల్గొనే ఉద్యోగులు ఎన్నికల సామగ్రి స్వీకరణ, పోలింగ్ నిర్వహణ, పోలింగ్ అనంతరం ఎన్నికల సామగ్రి అప్పగింత వంటి బాధ్యతలను నిర్వర్తించాల్సి ఉంటుందని తెలిపారు. ఎన్నికల విధుల కారణంగా ఉద్యోగులు ఎక్కువ సమయం విధుల్లో ఉండటంతో పాటు, దూర ప్రాంతాల్లో విధులు నిర్వహించే సిబ్బంది ప్రయాణపరమైన ఇబ్బందులను కూడా ఎదుర్కొంటారని పేర్కొన్నారు.
ప్రజాస్వామ్య పరిరక్షణలో ఎన్నికల నిర్వహణ అత్యంత కీలకమని, ఎన్నికలను సజావుగా నిర్వహించడంలో ప్రభుత్వ ఉద్యోగుల పాత్ర ఎంతో ముఖ్యమైనదని నల్లపల్లి విజయ్ భాస్కర్ తెలిపారు. ఎన్నికల విధులను అంకితభావంతో నిర్వహించే ఉద్యోగుల శ్రమను ప్రభుత్వం గుర్తించాలని కోరారు. ఎన్నికల విధుల్లో పాల్గొనే ఉద్యోగుల సంక్షేమాన్ని దృష్టిలో ఉంచుకుని ప్రభుత్వం, ఎన్నికల సంఘం సానుకూలంగా స్పందించి నవంబర్ 2న ఆన్‌డ్యూటీ సౌకర్యం కల్పించాలని ఏపీ స్టేట్ ఎంప్లాయిస్ అసోసియేషన్ పక్షాన నల్లపల్లి విజయ్ భాస్కర్ కోరారు. దీనివల్ల ఉద్యోగులకు అవసరమైన విశ్రాంతి లభించడంతో పాటు, వారు ఎదుర్కొనే ప్రయాణ, విధి నిర్వహణ సంబంధిత ఇబ్బందులు తగ్గుతాయని పేర్కొన్నారు.
మల్లికార్జున నేటి దినపత్రిక సూర్య స్టాఫ్ రిపోర్టర్..
