మున్సిపాలిటీ ఎన్నికలు ప్రశాంతం జరిగేలా ప్రజలు సహకరించాలి. సీఐ హరినాథ్

కళ్యాణదుర్గం: మున్సిపల్ ఎన్నికలను ప్రశాంతమైన వాతావరణంలో, ఎలాంటి అవాంఛనీయ సంఘటనలకు తావులేకుండా నిర్వహించేందుకు పట్టణ ప్రజలు పోలీసులకు సహకరించాలని కళ్యాణదుర్గం పట్టణ సీఐ హరినాథ్ సూచించారు. ఎన్నికల సందర్భంగా ప్రజలు సంయమనం పాటిస్తూ ప్రజాస్వామ్య విలువలను కాపాడాలని కోరారు. ప్రతి ఓటరు ఎలాంటి ప్రలోభాలకు, ఒత్తిళ్లకు లొంగకుండా స్వేచ్ఛగా తమ ఓటు హక్కును వినియోగించుకోవాలని తెలిపారు. ఎన్నికల నియమావళిని ప్రతి ఒక్కరూ తప్పనిసరిగా పాటించాలని స్పష్టం చేశారు. రాజకీయ పార్టీలు, అభ్యర్థులు ఎన్నికల ప్రచారం ముగిసిన అనంతరం నిబంధనలకు విరుద్ధంగా ప్రచార కార్యక్రమాలు నిర్వహించరాదని సూచించారు. ఓటర్లను ప్రభావితం చేసే విధంగా నగదు, మద్యం, ఇతర వస్తువుల పంపిణీకి పాల్పడితే చట్టపరమైన చర్యలు తీసుకుంటామని హెచ్చరించారు. ఎన్నికల సమయంలో అనుమానాస్పద వ్యక్తులు సంచరించినా, నగదు లేదా మద్యం అక్రమంగా తరలించినా పోలీసుల దృష్టికి తీసుకురావాలని కోరారు. పోలింగ్ కేంద్రాల వద్ద ఎలాంటి గుంపులు గుమిగూడకుండా, ఓటర్లు క్రమశిక్షణతో తమ ఓటు హక్కును వినియోగించుకోవాలని తెలిపారు. రాజకీయ పార్టీలకు చెందిన నాయకులు, కార్యకర్తలు పరస్పర ఆరోపణలు, వాగ్వాదాలు, ఘర్షణలకు దిగకుండా సంయమనం పాటించాలన్నారు. సోషల్ మీడియా వేదికగా తప్పుడు ప్రచారాలు, రెచ్చగొట్టే పోస్టులు, కులమత విద్వేషాలు కలిగించే సందేశాలను ప్రచారం చేయవద్దని సూచించారు. ఎన్నికల ప్రక్రియకు ఆటంకం కలిగించే చర్యలను పోలీసులు తీవ్రంగా పరిగణిస్తారని పేర్కొన్నారు. పట్టణంలో శాంతిభద్రతల పరిరక్షణకు పోలీసు సిబ్బంది నిరంతరం అప్రమత్తంగా ఉంటారని, సమస్యాత్మక ప్రాంతాలపై ప్రత్యేక నిఘా ఏర్పాటు చేస్తామని తెలిపారు. ఎన్నికల విధుల్లో ఉన్న పోలీసు సిబ్బందికి ప్రజలు సహకరించాలని, పోలింగ్ కేంద్రాల వద్ద విధులు నిర్వహించే అధికారుల సూచనలను పాటించాలని కోరారు. ఎన్నికలు అనేవి ప్రజాస్వామ్యంలో కీలకమైన ప్రక్రియ అని, ప్రతి ఒక్కరూ బాధ్యతాయుతంగా వ్యవహరించినప్పుడే స్వేచ్ఛాయుత, నిష్పక్షపాత ఎన్నికలు సాధ్యమవుతాయని సీఐ హరినాథ్ పేర్కొన్నారు. పట్టణంలో ప్రశాంత వాతావరణాన్ని కొనసాగించడం పోలీసుల బాధ్యత మాత్రమే కాకుండా ప్రతి పౌరుడి బాధ్యత అని, ప్రజలందరూ పోలీసులకు సహకరించి ఎన్నికలను విజయవంతం చేయాలని ఆయన విజ్ఞప్తి చేశారు.
కళ్యాణదుర్గం టౌన్ రిపోర్టర్ :- బోయ రంగస్వామి.