గుజరాత్‌లో పర్యటించిన మోదీ: పశు సంవర్ధక, బ్రీడింగ్ టెక్నాలజీ కేంద్రం పరిశీలన
సూర్య నేషనల్ బ్యూరో, గాంధీనగర్:*గుజరాత్ పర్యటనలో భాగంగా ప్రధానమంత్రి నరేంద్ర మోదీ బనస్కాంత జిల్లాలో పర్యటించి, భారత్ బోవైన్ బ్రీడింగ్ అండ్ రీసెర్చ్ సెంటర్ పశువుల ఫామ్‌తో పాటు ఎంబ్రియో ట్రాన్స్‌ఫర్ టెక్నాలజీ-ఇన్ విట్రో ఫెర్టిలైజేషన్ అత్యాధునిక ప్రయోగశాలను సందర్శించారు. పాడి పరిశ్రమలో ఆధునిక పునరుత్పత్తి సాంకేతికతలను, స్థానిక గోజాతుల (ముఖ్యంగా కాంక్రేజ్ జాతి) జన్యు నాణ్యతను మెరుగుపరిచేందుకు చేపడుతున్న పరిశోధనలను ఆయన స్వయంగా పరిశీలించారు.
ఈ సందర్భంగా శాస్త్రవేత్తలు, నిపుణులతో మాట్లాడిన ప్రధాని, ల్యాబ్‌లో పిండ మార్పిడి టెస్ట్‌ట్యూబ్ పద్ధతుల ద్వారా అధిక పాల దిగుబడినిచ్చే మేలుజాతి పశువులను ఎలా అభివృద్ధి చేస్తున్నారో వివరాలు తెలుసుకున్నారు. గ్రామీణ ఆర్థిక వ్యవస్థకు పాడి పరిశ్రమ వెన్నెముక అని, శాస్త్రీయ పద్ధతుల ద్వారా పశు సంపద ఉత్పాదకతను పెంచడం ద్వారా రైతులు, పాడి రైతుల ఆదాయాన్ని గణనీయంగా పెంచవచ్చని ప్రధాని పేర్కొన్నారు. స్థానిక మహిళా పాడి రైతులతో కూడా ఆయన ముచ్చటించి వారి అనుభవాలను అడిగి తెలుసుకున్నారు.
అనంతరం బనస్కాంత పరిధిలో పలు అభివృద్ధి పనులను ప్రారంభించిన ప్రధాని, బనాస్ డెయిరీ ఆధ్వర్యంలో ఏర్పాటు చేయనున్న బయో-సీఎన్‌జీ ప్లాంట్లు సహా పలు మౌలిక వసతుల ప్రాజెక్టులకు శంకుస్థాపన చేశారు. ఆధునిక బయోటెక్నాలజీ వినియోగం ద్వారా భారతీయ పాడి రంగం అంతర్జాతీయ స్థాయిలో సరికొత్త రికార్డులను సృష్టిస్తుందని ఆశాభావం వ్యక్తం చేశారు.
