విదేశీ రాయబారులకు బీజేపీ చీఫ్ దీపావళి విందు: 50 దేశాల ప్రతినిధులతో నితిన్ నబీన్ భేటీ

సూర్య నేషనల్ బ్యూరో, న్యూఢిల్లీ: దేశ రాజధాని న్యూఢిల్లీలోని భారతీయ జనతా పార్టీ ప్రధాన కార్యాలయంలో విదేశీ దౌత్యవేత్తలకు ప్రత్యేక ‘దీపావళి మిలన్ సమారోహ్’ కార్యక్రమం ఘనంగా నిర్వహించారు. బీజేపీ జాతీయ అధ్యక్షుడు నితిన్ నబీన్ ఆధ్వర్యంలో ఏర్పాటు చేసిన ఈ వేడుకకు ప్రపంచవ్యాప్తంగా దాదాపు 50 దేశాలకు చెందిన దౌత్య కార్యాలయాల అధిపతులు (హెడ్స్ ఆఫ్ మిషన్), డిప్యూటీ చీఫ్స్ ఆఫ్ మిషన్ సహా 90 మందికి పైగా సీనియర్ దౌత్యవేత్తలు హాజరయ్యారు. కేంద్ర మంత్రులు, బీజేపీ సీనియర్ నాయకులు సైతం ఈ ప్రత్యేక సమావేశంలో భాగస్వామ్యమయ్యారు.

భారతీయ సనాతన సంస్కృతి, సాంప్రదాయాలను, పండుగ శోభను అంతర్జాతీయ సమాజంతో పంచుకోవడమే లక్ష్యంగా ఈ కార్యక్రమాన్ని నిర్వహించారు. విదేశీ ప్రతినిధులకు భారతీయ సంప్రదాయ పద్ధతిలో ఘన స్వాగతం పలికారు. ఈ సందర్భంగా ప్రధాని నరేంద్ర మోదీ ‘వసుధైవ కుటుంబకం’ నినాదాన్ని ప్రతిబింబించేలా ప్రపంచ దేశాలతో మైత్రి, పరస్పర అవగాహన, సద్భావనను పెంపొందించుకోవడమే ఈ సమావేశ ఉద్దేశమని బీజేపీ అధ్యక్షుడు పేర్కొన్నారు.

సాంస్కృతిక దౌత్యంలో భాగంగా ఏర్పాటు చేసిన సంగీత సమ్మేళనం, సంప్రదాయ దీపాలంకరణలు అతిథులను విశేషంగా ఆకట్టుకున్నాయి. అంతర్జాతీయ వేదికలపై భారత సాంస్కృతిక వైభవాన్ని చాటిచెప్పడంతో పాటు విదేశాలతో ద్వైపాక్షిక సంబంధాలను మరింత బలోపేతం చేయడంలో ఇలాంటి సమారోహాలు దోహదపడతాయని పార్టీ విదేశీ వ్యవహారాల విభాగం వెల్లడించింది. పరస్పరం దీపావళి శుభాకాంక్షలు తెలుపుకుంటూ కార్యక్రమాన్ని ముగించారు.