ముక్కామల గ్రంథాలయంలో అడవి బాపిరాజు 131వ జయంతి వేడుకలు

తూర్పుగోదావరి జిల్లా, పెరవలి మేజర్ న్యూస్ :తూర్పుగోదావరి జిల్లా పెరవలి మండలం ముక్కామల గ్రామంలోని శ్రీ ఇనుప కోళ్ల రాఘవరావు మెమోరియల్ శాఖా గ్రంథాలయంలో కళామతల్లి ముద్దుబిడ్డ, బహుముఖ ప్రజ్ఞాశాలి అడవి బాపిరాజు 131వ జయంతి వేడుకలను అక్టోబర్ 8వ తేదీ గురువారం ఘనంగా నిర్వహించారు. ఈ సందర్భంగా ఆయన చిత్రపటానికి పూలమాల వేసి ఘనంగా నివాళులర్పించారు.

ఈ కార్యక్రమంలో గ్రంథాలయ అధికారి ఎం. వెంకటేశ్వర్లు, గ్రంథాలయ అభివృద్ధి కమిటీ సభ్యులు కరటూరి కామేశ్వరరావు, పాతూరి వెంకటేశ్వరరావు, సుంకవల్లి వెంకటగిరితో పాటు పాఠకులు, విద్యార్థులు పాల్గొన్నారు.ఈ సందర్భంగా గ్రంథాలయ అభివృద్ధి కమిటీ సభ్యులు కరటూరి కామేశ్వరరావు మాట్లాడుతూ, అడవి బాపిరాజు సాహిత్యం, చిత్రకళ తదితర రంగాల్లో విశేష ప్రతిభ కనబరిచిన బహుముఖ ప్రజ్ఞాశాలి అని కొనియాడారు. ఆయన రచించిన నారాయణరావు నవల విశేష ప్రాచుర్యం పొందిందని తెలిపారు. 

ఆ కాలంలో విశ్వనాథ సత్యనారాయణ రచించిన వేయిపడగలు నవలతో పోటీపడి ఆంధ్ర కళాపరిషత్తులో ప్రథమ బహుమతి సాధించడం ఆయన సాహితీ ప్రతిభకు నిదర్శనమని పేర్కొన్నారు. అడవి బాపిరాజు చిత్రీకరించిన అజంతా, ఎల్లోరా గుహల చిత్రాలు విశేష ఖ్యాతిని సంపాదించి దేశవిదేశాల్లో గుర్తింపు పొందాయని తెలిపారు.

 సాహిత్యం, చిత్రకళకు ఆయన అందించిన సేవలు భావితరాలకు స్ఫూర్తిదాయకమని పేర్కొన్నారు. ఇలాంటి మహనీయుల జయంతి కార్యక్రమాలను గ్రంథాలయాల్లో నిర్వహించడం ద్వారా విద్యార్థులు, యువతలో సాహిత్యం, కళల పట్ల ఆసక్తిని పెంపొందించవచ్చని అన్నారు.