మంగొల్లులో వైఎస్సార్‌సీపీ స్థానిక సంస్థల సమావేశం పార్టీ బలోపేతానికి కృషి చేయాలి: తన్నీరు నాగేశ్వరరావు
వత్సవాయి: ఎన్టీఆర్ జిల్లా జగ్గయ్యపేట నియోజకవర్గం వత్సవాయి మండలం మంగొల్లు గ్రామంలో వైఎస్సార్ కాంగ్రెస్ పార్టీ ఆధ్వర్యంలో స్థానిక సంస్థల సమావేశం, ఐడీ కార్డుల పంపిణీ కార్యక్రమం నిర్వహించారు. ఈ కార్యక్రమానికి జగ్గయ్యపేట నియోజకవర్గ వైఎస్సార్‌సీపీ ఇన్‌ఛార్జి తన్నీరు నాగేశ్వరరావు హాజరై పార్టీ నాయకులు, కార్యకర్తలతో సమావేశమయ్యారు. అనంతరం పార్టీ శ్రేణులకు ఐడీ కార్డులు పంపిణీ చేశారు.ఈ సందర్భంగా తన్నీరు నాగేశ్వరరావు మాట్లాడుతూ పార్టీని క్షేత్రస్థాయిలో మరింత బలోపేతం చేయడానికి నాయకులు, కార్యకర్తలు సమన్వయంతో పనిచేయాలని సూచించారు. ప్రజలు ఎదుర్కొంటున్న సమస్యలను గుర్తించి, వాటి పరిష్కారం కోసం నిరంతరం కృషి చేయాలని పిలుపునిచ్చారు. ఎన్నికల సమయంలో కూటమి ప్రభుత్వం ప్రజలకు ఇచ్చిన హామీలు, వాటి అమలులో ఉన్న లోపాలను ప్రజలకు వివరించాలని పార్టీ శ్రేణులకు సూచించారు.గత వైఎస్సార్‌సీపీ ప్రభుత్వ హయాంలో అమలు చేసిన సంక్షేమ పథకాలను ప్రజలకు వివరించాలని పేర్కొన్నారు. సంక్షేమ పథకాల గురించి మాట్లాడినప్పుడు వైఎస్ జగన్ మోహన్ రెడ్డి పేరు ప్రజలకు గుర్తుకొస్తుందని అన్నారు. అర్హులైన ప్రతి ఒక్కరికీ సంక్షేమ ఫలాలు అందించడమే లక్ష్యంగా గత ప్రభుత్వం పనిచేసిందని పేర్కొన్నారు.పార్టీ నాయకులు, కార్యకర్తలు ఐక్యంగా ఉంటూ ప్రజలకు అందుబాటులో ఉండాలని, స్థానిక సమస్యలపై స్పందిస్తూ ప్రజల పక్షాన నిలవాలని కోరారు. గ్రామస్థాయిలో పార్టీని బలోపేతం చేసేందుకు ప్రతి ఒక్కరూ కృషి చేయాలని పిలుపునిచ్చారు.ఈ కార్యక్రమంలో జగ్గయ్యపేట మండల పార్టీ అధ్యక్షుడు బూడిద నరసింహారావు, గ్రామ పార్టీ అధ్యక్షుడు బొల్లం కిరణ్, మన్నే పాపయ్య, మాజీ సొసైటీ అధ్యక్షుడు శరణం కృష్ణారావు, మాజీ ఎంపీటీసీ సభ్యుడు గడ్డం శ్రీనివాసరావు, మాజీ ఉపసర్పంచ్ మెట్టిల వెంకటేశ్వర్లు, సింగాల వెంకటేశ్వర్లు, అన్నేపాక రత్నం, జెట్టి ప్రసాద్, జెట్టి శ్రీను, పాపగంటి ప్రవీణ్, గుంటూరు ఏడుకొండలు, షేక్ గురునాథం, షేక్ సైదులు, అన్నేపాక దాస్, దేవుడు ప్రసాద్‌తో పాటు పార్టీ నాయకులు, కార్యకర్తలు, అభిమానులు పాల్గొన్నారు.
