ఒమన్ తీరంలో ఆయిల్ ట్యాంకర్‌పై డ్రోన్ దాడి: ఇద్దరు భారత నావికులు గల్లంతు.. 9 మంది సురక్షితం!
సూర్య అంతర్జాతీయ & రక్షణ డెస్క్: ఒమన్ సముద్ర తీరంలోని సోహార్ ఎంకరేజ్ వద్ద ఆయిల్ ట్యాంకర్‌పై జరిగిన డ్రోన్ దాడి ఘటనలో ఇద్దరు భారతీయ నావికులు గల్లంతయ్యారు. 11 మంది భారత సిబ్బందితో వెళ్తున్న ‘ఎంటీ పెట్రో డాల్ఫిన్’ (MT Petro Dolphin) అనే నౌక ఆదివారం డ్రోన్ దాడికి గురైనట్లు కేంద్ర ఓడరేవులు, నౌకాయాన శాఖ మంత్రి సర్బానంద సోనోవాల్ వెల్లడించారు.
ఓడలోని 11 మంది భారతీయుల్లో 9 మందిని సురక్షితంగా రక్షించామని, మిగిలిన ఇద్దరి ఆచూకీ కోసం స్థానిక కోస్ట్ గార్డ్ బలగాలు ముమ్మరంగా గాలింపు చర్యలు చేపడుతున్నాయని మంత్రి 'ఎక్స్' వేదికగా తెలిపారు. నికరాగ్వా జెండాతో ప్రయాణిస్తున్న ఈ నౌక పరిస్థితిని మస్కట్‌లోని భారత రాయబార కార్యాలయం నిశితంగా పర్యవేక్షిస్తూ ఒమన్ అధికారులతో సంప్రదింపులు జరుపుతోంది.
కాగా, కొద్దిరోజుల క్రితం (అక్టోబర్ 6న) కూడా ఒమన్ సమీపంలో 'ఎంటీ ఆన్ పీస్' అనే వాణిజ్య నౌకపై దాడి జరిగి 11 మంది భారతీయ నావికులు గాయపడ్డారు. అంతర్జాతీయ సముద్ర మార్గాల్లో పౌర వాణిజ్య నౌకలను లక్ష్యంగా చేసుకుని జరుగుతున్న ఇలాంటి దాడులను వెంటనే నిలిపివేయాలని భారత విదేశాంగ శాఖ ఇప్పటికే తీవ్ర ఆందోళన వ్యక్తం చేసింది.
