కింబర్లీ గిల్‌ఫాయిల్‌పై ట్రంప్ వేటుకు రంగం సిద్ధం:.తీవ్ర ఆరోపణల నేపథ్యంలో నిర్ణయం!
సూర్య అంతర్జాతీయ డెస్క్: గ్రీస్‌లోని అమెరికా రాయబారిగా బాధ్యతలు నిర్వర్తిస్తున్న కింబర్లీ గిల్‌ఫాయిల్‌ను ఆ పదవి నుంచి తప్పించేందుకు అధ్యక్షుడు డొనాల్డ్ ట్రంప్ సన్నాహాలు చేస్తున్నట్లు అంతర్జాతీయ మీడియా వర్గాలు వెల్లడించాయి. ఆమెపై వరుసగా పలు దుష్ప్రవర్తన మరియు నిబంధనల ఉల్లంఘన ఆరోపణలు వెల్లువెత్తడంతో వైట్‌హౌస్ వర్గాలు ఈ కఠిన నిర్ణయానికి వచ్చినట్లు నివేదికలు స్పష్టం చేస్తున్నాయి. కింబర్లీ గతంలో డొనాల్డ్ ట్రంప్ పెద్ద కుమారుడైన జూనియర్ ట్రంప్‌తో నిశ్చితార్థం చేసుకుని, అనంతరం విడిపోయిన విషయం విధితమే.
తాజాగా బయటపడిన వివరాల ప్రకారం, మాగా (MAGA) విరాళకర్త ఎరిక్ డీటర్స్‌తో కింబర్లీ జరిపిన లావాదేవీల వ్యవహారం తీవ్ర వివాదాస్పదంగా మారింది. ట్రంప్ రాజకీయ వర్గాలలోని ప్రముఖులను కలిసే అవకాశం కల్పిస్తాననే హామీతో, తన వ్యక్తిగత అమెరికన్ ఎక్స్‌ప్రెస్ కార్డుకు సంబంధించిన దాదాపు లక్ష డాలర్ల బకాయిలను చెల్లించాల్సిందిగా ఆమె ఆయనను కోరినట్లు ప్రధాన ఆరోపణలు వచ్చాయి. దౌత్యపరమైన హోదాలో ఉంటూ వ్యక్తిగత లబ్ధి కోసం రాజకీయ పరపతిని ఉపయోగించుకునే ప్రయత్నం చేయడం అమెరికా అధికార వర్గాల్లో తీవ్ర కలకలం రేపింది.
ఈ రకమైన నిబంధనల అతిక్రమణలపై స్వదేశంలో తీవ్ర విమర్శలు వెల్లువెత్తడంతో, దౌత్య విభాగానికి చెడ్డపేరు రాకుండా ఉండేందుకు ఆమెను పదవి నుంచి తొలగించడమే సరైన మార్గమని ట్రంప్ భావిస్తున్నట్లు తెలుస్తోంది. రాయబారి పదవి నుంచి ఆమె తొలగింపునకు సంబంధించిన అధికారిక ప్రక్రియ త్వరలోనే పూర్తి కావచ్చని సమాచారం. అంతర్జాతీయ వేదికలపై అమెరికా ప్రతిష్టను కాపాడే క్రమంలో ఈ నిర్ణయం తప్పనిసరిగా మారినట్లు దౌత్య విశ్లేషకులు భావిస్తున్నారు.
