షాపింగ్ కోసం క్రెడిట్ కార్డు ఫొటోలు గ్రోక్‌కు పంపండి: ఎలాన్ మస్క్ సూచనపై భగ్గుమన్న ప్రైవసీ ఆందోళనలు!
సూర్య టెక్నాలజీ & సైబర్ సెక్యూరిటీ డెస్క్: ఆర్టిఫిషియల్ ఇంటెలిజెన్స్ చాట్‌బాట్ 'గ్రోక్' (Grok) ద్వారా ఆన్‌లైన్ షాపింగ్‌ను సులభతరం చేసేందుకు ఎలాన్ మస్క్ చేసిన తాజా ప్రతిపాదన తీవ్ర దుమారం రేపుతోంది. యూజర్లు తమ క్రెడిట్ కార్డు ఫొటోలను గ్రోక్ చాట్‌బాట్‌కు అప్‌లోడ్ చేస్తే, అది అత్యుత్తమ డీల్స్‌ను వెతికి కొనుగోళ్లను పూర్తి చేస్తుందంటూ మస్క్ చేసిన సూచనపై నిపుణులు, నెటిజన్లు తీవ్ర అభ్యంతరం వ్యక్తం చేస్తున్నారు.
మస్క్ వ్యాఖ్యలపై 'ఎక్స్' వేదికగా కమ్యూనిటీ నోట్ హెచ్చరిక జారీ చేసింది. గ్రోక్‌ను అభివృద్ధి చేసిన మస్క్ సొంత సంస్థ 'xAI' నిబంధనల ప్రకారమే.. ప్రాంప్ట్‌లలో వ్యక్తిగత వివరాలను పంచుకోవద్దని యూజర్లకు ముందస్తు హెచ్చరికలు ఉన్న విషయాన్ని ఆ నోట్ గుర్తుచేసింది. ఈ విధానం షాపింగ్ ప్రక్రియను వేగవంతం చేసినప్పటికీ, సున్నితమైన బ్యాంకింగ్ మరియు ఆర్థిక సమాచారం ఎంతవరకు సురక్షితంగా ఉంటుంది, ఆ డేటాను ఎలా భద్రపరుస్తారనే అంశాలపై సర్వత్రా ఆందోళనలు వ్యక్తమవుతున్నాయి.
సైబర్ మోసాలు, డేటా లీకేజీలు పెరిగిపోతున్న ప్రస్తుత తరుణంలో పూర్తి క్రెడిట్ కార్డు వివరాలను నేరుగా ఏఐ మోడళ్లకు అందించడం తీవ్ర ఆర్థిక నష్టాలకు దారితీస్తుందని సైబర్ భద్రతా నిపుణులు హెచ్చరిస్తున్నారు. వినియోగదారుల వ్యక్తిగత, ఆర్థిక గోప్యతకు భంగం కలిగించే ఇలాంటి ఫీచర్లపై నియంత్రణ సంస్థలు నిఘా ఉంచాలని పలువురు డిమాండ్ చేస్తున్నారు.
