భారతదేశంలో భారీ నదుల అనుసంధాన ప్రాజెక్ట్‌పై వ్యతిరేకత..మునిగిపోతున్న ఇళ్లు, ఆలయాలు
సూర్య జాతీయ డెస్క్: భారత్ ప్రభుత్వం అత్యంత ప్రతిష్టాత్మకంగా చేపట్టిన 87 బిలియన్‌ డాలర్ల భారీ నదుల అనుసంధాన ప్రాజెక్టుపై స్థానిక ప్రజలు, గిరిజనులు తీవ్ర వ్యతిరేకత వ్యక్తం చేస్తున్నారు. ప్రాజెక్ట్ పనుల కారణంగా నీటి మట్టాలు విపరీతంగా పెరిగి తమ నివాసాలు, పురాతన ఆలయాలు నీట మునుగుతున్నాయని ఆవేదన వ్యక్తం చేస్తూ నిర్వాసితులు రోడ్డెక్కారు. కేంద్రం చేపట్టిన ఈ ప్రాజెక్టు తమ జీవితాలను, ఉపాధిని చిన్నాభిన్నం చేస్తోందని మండిపడుతూ మధ్యప్రదేశ్‌లోని అజయ్‌గఢ్‌ ప్రాంతంలో కేన్ నదిలో మోకాళ్ల లోతు నీటిలో నిలబడి నిరసన కార్యక్రమాలు చేపట్టారు.
కేన్-బెట్వా నదుల అనుసంధాన ప్రాజెక్ట్‌లో భాగంగా నిర్మించతలపెట్టిన దౌధన్ డ్యామ్ వల్ల వేలాది ఎకరాల భూమి, పలు గ్రామాలు ముంపునకు గురవుతున్నాయని పర్యావరణ వేత్తలు, స్థానికులు ఆందోళన వ్యక్తం చేస్తున్నారు. ముఖ్యంగా ప్రాజెక్ట్ ప్రాంతంలోని ఇళ్లు మాత్రమే కాకుండా, స్థానికుల జీవనాధారంగా ఉన్న ఎన్నో దేవాలయాలు పూర్తిగా నీట మునిగిపోతున్నాయని పూజారులు వాపోతున్నారు. ప్రభుత్వం ఇస్తున్న నష్టపరిహారం తమ ప్రాణ త్యాగాలకు, కోల్పోయిన ఆస్తులకు సరిపోదని, కేవలం ఇళ్లకి మాత్రమే పరిమితం చేయడంపై నిర్వాసితులు తీవ్ర నిరాశ వ్యక్తం చేస్తున్నారు.
ఈ భారీ ప్రాజెక్టు ద్వారా పన్నా టైగర్ రిజర్వ్‌తో సహా సుమారు 9,000 హెక్టార్ల అటవీ భూమి నీట మునుగుతుందని పర్యావరణవేత్తలు హెచ్చరిస్తున్నారు. ఇది దేశంలోని అత్యంత విజయవంతమైన పులుల సంరక్షణ కేంద్రాలలో ఒకదానిపై తీవ్ర ప్రభావం చూపుతుందని ఆందోళన వ్యక్తమవుతోంది. మరోవైపు, నదుల అనుసంధాన ప్రాజెక్ట్ శాస్త్రీయతపై కూడా పలువురు నిపుణులు అనుమానాలు వ్యక్తం చేస్తున్నారు. కేన్ బేసిన్‌లో నీటి మిగులు, బెట్వా బేసిన్‌లో లోటు ఉందనే అంచనాల ఆధారంగానే ఈ ప్రాజెక్టు రూపుదిద్దుకుందని, అయితే ఈ జల వనరుల అంచనా శాస్త్రీయంగా నిరూపితం కాలేదని విమర్శకులు అభిప్రాయపడుతున్నారు.
