ఆసియాలోనే అతిపెద్ద మురికివాడ ధారావి పునర్నిర్మాణం ప్రారంభం: అదానీ గ్రూప్ ఆధ్వర్యంలో భూమిపూజ.

సూర్య జాతీయ డెస్క్: ఆసియా ఖండంలోనే అతిపెద్ద మురికివాడగా పేరొందిన ముంబైలోని ధారావి పునరావాస, పునర్నిర్మాణ ప్రక్రియ అధికారికంగా ప్రారంభమైంది. ప్రముఖ పారిశ్రామికవేత్త గౌతమ్ అదానీకి చెందిన సంస్థ ఆధ్వర్యంలో మాతుంగాలోని 22 ఎకరాల రైల్వే భూమిలో సోమవారం ఘనంగా భూమిపూజ కార్యక్రమం నిర్వహించారు. ఈ మెగా ప్రాజెక్టు ద్వారా వేలాది మంది స్థానికులకు ఆధునిక వసతులతో కూడిన పక్కా గృహాలను అందించే దిశగా తొలి అడుగు పడింది.

ఈ ప్రాజెక్టులో భాగంగా మాతుంగా స్థలంలో 37 నుంచి 39 అంతస్తుల భారీ స్కైస్క్రాపర్లుగా 10 రెసిడెన్షియల్ టవర్లను నిర్మించనున్నారు. ఇందులో ఒక్కొక్కటి 350 చదరపు అడుగుల విస్తీర్ణంతో కూడిన మొత్తం 10,432 నివాస గృహాలను సిద్ధం చేయనున్నారు. ఆధునిక మౌలిక సదుపాయాలు, తాగునీరు, డ్రైనేజీ మరియు రవాణా సౌకర్యాలను అనుసంధానిస్తూ నిర్మించే ఈ భారీ టవర్ల ద్వారా మురికివాడ వాసులకు మెరుగైన జీవన ప్రమాణాలు కల్పించడమే లక్ష్యంగా పెట్టుకున్నారు.

ఈ నూతన నివాసాలలో ధారావి పరిధిలోని సెక్టార్ 6 మరియు సెక్టార్ 1 నివాసితులకు ప్రాథమిక కేటాయింపులు (ఇనీషియల్ ఆక్యుపెన్సీ) కల్పించనున్నట్లు ప్రాజెక్టు వర్గాలు వెల్లడించాయి. ఏళ్ల తరబడి సరైన మౌలిక వసతులు లేక ఇబ్బందులు పడుతున్న ధారావి ప్రజల జీవన శైలిని పూర్తిగా మార్చేలా ఈ భారీ పునర్నిర్మాణ కార్యక్రమం కొనసాగనుంది. దేశ వాణిజ్య రాజధాని ముంబై రూపురేఖలను సమూలంగా మార్చే ఈ ప్రతిష్టాత్మక ప్రాజెక్టు పనులను వేగవంతం చేసేందుకు ప్రభుత్వం, డెవలపర్లు సమన్వయంతో ముందుకు సాగుతున్నారు.