'మిస్టర్ ఇండియా' పోటీల్లో సత్తా చాటిన ధిల్లేశ్వరరావు.... ఘనంగా సత్కరించిన ఎమ్మెల్యే గొండు శంకర్

శ్రీకాకుళం, సూర్య : శ్రీకాకుళం: జైపూర్ వేదికగా జరిగిన 58వ మిస్టర్ ఇండియా బాడీబిల్డింగ్ ఛాంపియన్‌షిప్‌ పోటీల్లో శ్రీకాకుళం కుర్రాడు కండల సత్తా చాటాడు. ఈ ప్రతిష్టాత్మక పోటీల్లో 75 కిలోల విభాగంలో బరిలోకి దిగిన రెడ్డి ధిల్లేశ్వరరావు.. జాతీయ స్థాయిలో అత్యుత్తమ ప్రతిభ కనబరిచి ద్వితీయ స్థానంలో నిలిచాడు. దేశవ్యాప్తంగా ఎంతోమంది ఉద్ధండులు పోటీపడిన ఈ వేదికపై రజత పతకం కైవసం చేసుకుని, జిల్లాకే గర్వకారణంగా నిలిచాడు. ఈ అరుదైన ఘనత సాధించి స్వగ్రామానికి చేరుకున్న ధిల్లేశ్వరరావును శ్రీకాకుళం ఎమ్మెల్యే గొండు శంకర్ ఘనంగా సత్కరించారు. విజేతను స్వయంగా కలిసిన ఎమ్మెల్యే.. శాలువాతో సత్కరించి, జ్ఞాపికను (ట్రోఫీని) బహూకరించి ఆత్మీయంగా అభినందించారు. జాతీయ స్థాయిలో మన ప్రాంత ప్రతిష్టను ఇనుమడింపజేయడం పట్ల ఆయన హర్షం వ్యక్తం చేశారు. యువతకు ధిల్లేశ్వరరావు కఠోర శ్రమ ఎంతో స్ఫూర్తిదాయకమని కొనియాడారు. భవిష్యత్తులో మరింతగా రాణించి ఏకంగా 'మిస్టర్ ఇండియా' టైటిల్‌నే సొంతం చేసుకోవాలని ఎమ్మెల్యే ఆకాంక్షించారు. ఈ ఉత్సాహభరిత వాతావరణంలో ఉప్పంగి పంచాయతీకి చెందిన కూటమి పార్టీల నాయకులు, కార్యకర్తలు పాల్గొని క్రీడాకారుడికి తమ హృదయపూర్వక అభినందనలు తెలిపారు.

రిపోర్టర్ : గోపాల్ కృష్ణ, నరసన్నపేట, శ్రీకాకుళం జిల్లా.