మత్స్యకార కుటుంబాల జీవనోపాధిని రాజకీయ ప్రయోజనాల కోసం దెబ్బతీయవద్దు హైకోర్టు ఉత్తర్వులు అమలులో ఉండగా రాజకీయ జోక్యం ఎందుకు?

టి.నరసాపురం:మేజర్ న్యూస్ కోర్టు మధ్యంతర ఉత్తర్వులు అమలులో ఉన్న సమయంలో మత్స్యకారుల వ్యవహారాల్లో రాజకీయ జోక్యం ఎందుకని ఉమ్మడి పశ్చిమగోదావరి జిల్లా మత్స్యకారుల సంఘం మాజీ కార్యవర్గ సభ్యులు గుండె చిన్న చిట్టయ్య ప్రశ్నించారు.మీడియాతో ఆయన మాట్లాడుతూ.. సోమవారం బొర్రంపాలెంలో పర్యటించిన గృహ నిర్మాణ శాఖ మంత్రి కొలుసు పార్థసారథి, హైకోర్టు మధ్యంతర ఉత్తర్వులు అమలులో ఉన్న సమయంలో మత్స్యశాఖ అధికారిని పిలిపించుకోవడం మత్స్యకారుల్లో తీవ్ర ఆందోళనకు కారణమైందన్నారు.

గృహ నిర్మాణ శాఖ మంత్రికి బొర్రంపాలెం మత్స్యకారుల వ్యవహారాలతో సంబంధం ఏమిటని ప్రశ్నించారు. ఆయన మత్స్యశాఖ మంత్రి కాదని, జిల్లా ఇన్‌చార్జి మంత్రి కూడా కాదని పేర్కొంటూ.మత్స్యశాఖ అధికారిని ఏ కారణంతో పిలిపించారో మంత్రి, సంబంధిత అధికారులు స్పష్టమైన వివరణ ఇవ్వాలని డిమాండ్ చేశారు.హైకోర్టు ఉత్తర్వులు అమలులో ఉన్న సమయంలో మత్స్య సహకార సంఘం కార్యకలాపాల్లో ఎవరైనా జోక్యం చేసుకోవడం, మత్స్యకారుల లీజు హక్కులకు ఆటంకం కలిగించడం లేదా అధికారులపై ఒత్తిడి తీసుకురావడం జరిగితే, సంబంధిత అంశాలను గౌరవ హైకోర్టు దృష్టికి తీసుకెళ్లి కోర్టు ధిక్కరణ చర్యలకు సంబంధించి న్యాయపరమైన చర్యలు చేపడతామని చిట్టయ్య హెచ్చరించారు.186 మత్స్యకార కుటుంబాల జీవనోపాధిని రాజకీయ ప్రయోజనాల కోసం దెబ్బతీయవద్దని ఆయన కోరారు. ప్రభుత్వం తక్షణమే జోక్యం చేసుకుని హైకోర్టు ఉత్తర్వులను పూర్తిస్థాయిలో అమలు చేయాలని, కోర్టు ఉత్తర్వుల ప్రకారం మత్స్యకారుల లీజు హక్కులకు, వారి జీవనోపాధికి రక్షణ కల్పించాలని కోరారు.

 అద్దంకి గిరి కుమార్ క్రైమ్ రిపోర్టర్