మన్యం జిల్లా పాడి రైతుల వినూత్న ప్రయోగం.. సబ్సిడీతో సమకూరుతున్న మేలుజాతి సంపద

పార్వతీపురం, అక్టోబర్ 02 : ఆంధ్రప్రదేశ్ ప్రభుత్వ పశుసంవర్ధక శాఖ ఆధ్వర్యంలో పార్వతీపురం మన్యం జిల్లాలో అమలు చేస్తున్న "లింగ నిర్ధారిత వీర్యం" పథకం గ్రామీణ ప్రాంతాల్లో పశు సంపదను పెంపొందించడంలో గొప్ప విజయాన్ని సాధిస్తోంది. సాధారణంగా ఒక ఎద సూది ఖరీదు రూ. 300 కాగా, ప్రభుత్వం రూ. 150 సబ్సిడీగా అందిస్తోంది. దీంతో రైతు కేవలం రూ. 150 వాటాతో ఈ ఆధునిక సేవలను పొందగలుగుతున్నారు. ఈ సాంకేతికత ద్వారా దాదాపు 90 శాతం ఖచ్చితత్వంతో మేలుజాతి పెయ్య దూడలే జన్మిస్తున్నాయి. తక్కువ సమయంలోనే ఎక్కువ సంఖ్యలో మేలుజాతి పెయ్య దూడలు పుట్టడం వల్ల గ్రామాలలో నాణ్యమైన పశు సంపద వేగంగా అభివృద్ధి చెందుతోంది. భవిష్యత్తులో ఈ పెయ్య దూడల ద్వారా పాలదిగుబడి గణనీయంగా పెరిగి, పాడి రైతుల ఆర్థిక పరిస్థితి మెరుగుపడటంతో పాటు వారి కుటుంబాలకు నిలకడైన ఆదాయం చేకూరుతోంది. తక్కువ ఖర్చుతో ఎక్కువ ప్రయోజనం చేకూరుస్తున్న ఈ పథకం మన్యం జిల్లాలోని పాడి రైతులకు ఆర్థికంగా ఎంతో మేలు చేస్తూ విజయవంతంగా కొనసాగుతోంది.