మహిళల ఆర్థిక స్వావలంబన కు ఉపాధిశిక్షణకోర్సులతో సాధ్యం

 విజయనగరం (కల్చరల్) సూర్య : స్వచ్ఛంద సంస్థలు అందిస్తున్న ఉపాధి కోర్సులను అభ్యసించి మహిళలు ఆర్థిక స్వావలంబన సాధించాలని రోటరీ క్లబ్ గవర్నర్ గుత్తికొండ శ్రీరామ్ విజ్ఞప్తి చేశారు. బుధవారం విజయనగరం పట్టణంలోని పిడబ్ల్యుడి మార్కెట్లో రోటరీ సెంట్రల్ క్లబ్ అందిస్తున్న 90 రోజుల బ్యూటిషన్ కోర్స్ పూర్తి చేసిన మహిళలకు సర్టిఫికెట్లను అందజేశారు. ఈ సందర్భంగా రోటరీ గవర్నర్ మాట్లాడుతూ మహిళలు కుట్టు శిక్షణ , బ్యూటీషియన్, బుక్ బైండింగ్ తదితర కోర్సులలో శిక్షణ పొంది తద్వారా ఆర్థిక అభివృద్ధిని సాధించి ఇంటికి చేదోడుగా నిలవాలని సూచించారు. స్వచ్ఛంద సంస్థలు ఉచితంగా అందిస్తున్న శిక్షణ తరగతులను సద్వినియోగం చేసుకోవాలని పిలుపునిచ్చారు.ఈ  కార్యక్రమం లో  57మందికి సర్టిఫికెట్లను అందజేశారు. రోటరీ సెంట్రల్ క్లబ్ నిర్వహిస్తున్న ఉచిత శిక్షణా తరగతులకు చలాసాని గ్రూప్ సహకారం అందించడం అభినందనీయమన్నారు. ఈ కార్యక్రమంలో క్లబ్ అధ్యక్షుడు జి.జగదీష్, కార్యదర్శి చందు, క్లబ్ ప్రతినిధులు ఆర్.శంకర్ రెడ్డి, పి.జగదీష్ తదితరులు పాల్గొన్నారు.

 కల్చరల్ రిపోర్టర్, సూర్య, విజయనగరం