మద్యం షాపుల టెండర్ల ప్రక్రియపై ఎక్సైజ్ అధికారుల సమీక్ష

భీమవరం మేజర్ న్యూస్ :ఎక్సైజ్ శాఖ కమిషనర్ ఆదేశాల మేరకు, ప్రొహిబిషన్ & ఎక్సైజ్ జాయింట్ కమిషనర్, నోడల్ ఆఫీసర్ బి. అరుణరావు ఈరోజు భీమవరంలోని జిల్లా ఎక్సైజ్ అధికారి కార్యాలయంలో నిర్వహించిన ప్రత్యేక సమీక్షా సమావేశంలో పాల్గొన్నారు. ఈ సమావేశంలో ఏలూరు డిప్యూటీ కమిషనర్ బి. శ్రీలత, అసిస్టెంట్ కమిషనర్ ఎన్. ప్రభుకుమార్ మరియు పశ్చిమ గోదావరి జిల్లా ఎక్సైజ్ సూపరింటెండెంట్ బి. సుబ్బారావు హాజరై జిల్లాలోని మద్యం షాపుల కేటాయింపులపై చర్చించారు.ప్రధానంగా జిల్లా వ్యాప్తంగా మిగిలిపోయిన 25 మద్యం షాపులకు డ్రా విధానం ద్వారా కేటాయింపులు జరిపే ప్రక్రియను అధికారులు సమీక్షించారు. భీమవరం పరిధిలో 09, ఆకివీడులో 06, తణుకులో 05, నరసాపురంలో 03, ఉండి (గుండం) పరిధిలో 02 షాపులు అందుబాటులో ఉన్నట్లు తెలిపారు. జిల్లాలో సిండికేట్లకు తావులేకుండా, కలెక్టర్ సమక్షంలో పారదర్శకంగా లాటరీ పద్ధతి ద్వారా ఎన్నిక జరగాలని, ప్రతి షాపునకు కనీసం 10 దరఖాస్తులైనా వచ్చేలా చూడాలని ఆదేశించారు.ప్రభుత్వ ఆదాయానికి గండి పడకుండా లైసెన్సుదారులు సహకరించాలని, వ్యాపార ఆసక్తి ఉన్న అభ్యర్థులు ఈ అవకాశాన్ని సద్వినియోగం చేసుకోవాలని జిల్లా ఎక్సైజ్ అధికారి కోరారు. టెండర్ల నిర్వహణలో తీసుకోవాల్సిన జాగ్రత్తలపై డీసీ, ఏసీలతో పాటు అన్ని స్టేషన్ల ఎస్హెచ్ఓ (సీఐ)లకు మార్గదర్శకాలు జారీ చేశారు.

 శ్రీనివాస్ భీమవరం.